Ramadán e Pascua en Xerusalén baixo a Ocupación Israelí

As festividades musulmás e cristiás en Palestina son albo do exército, da policía e dos colonos israelís. Nun ano de aumento das tensións en Xerusalén, a poboación palestina foi vítima de agresións e ataques constantes durante o Ramadán e a Pascua. Ramadán: humillación e provocación Durante o mes de Ramadán, Xerusalén acolle milleiros de fieis que se desprazan á cidade para rezar na mesquita de Al Aqsa. Se ben todas as portas de acceso á explanada das mesquitas están sempre controladas polo exército israelí, neste Ramadán, que comezou o 11 de marzo e rematou o 9 de abril, aumentou considerablemente a presencia militar nas entradas, sobre todo nos venres, o día sagrado musulmán. Nas estradas e rúas próximas á explanada das mesquitas instaláronse barreiras de ferro durante todo o Ramadán, co fin de limitar o movemento das persoas musulmás residentes en Xerusalén. A comunidade musulmá máis afectada polas restricións foi a de Cisxordania. O ano pasado as mulleres, sen importar a idade, podían ir a Xerusalén os venres, identificándose só co seu carné palestino nos postos de control. No caso dos homes, o acceso estaba limitado a maiores de 55 anos ou varóns con permisos especiais. No Ramadán 2024 impuxéronse novas normas: só se concedeu autorización a homes maiores de 65 e a mulleres de máis de 50. Porén, ademais de precisar o carné de identidade, este ano tamén foi obrigatorio presentar unha tarxeta magnética especial expedida por Israel, para así controlar as entradas e saídas nos checkpoints situados ao longo da fronteira entre Israel e Cisxordania. Ahmad, musulmán de Ramallah, comparte a súa frustración e tristeza. "Non puiden ir rezar ningún venres. O ano pasado conseguín ir ao rezo Alqadar, o que ten lugar no día 27 de Ramadán, pero como o meu permiso remataba ás sete da tarde, tiven que pasar a noite na mesquita. Se corres o risco de saír e tes a mala sorte de que te controlen, poden arrestarte e incluso acabar en prisión". Israel agrediu, interrogou e arrestou palestinos e palestinas nas rúas de Xerusalén antes e despois dos momentos de oración Ademais de limitar o movemento, a seguridade israelí exerceu outros tipos de violencia sobre a poboación: de forma sistemática agrediu, interrogou e arrestou palestinos e palestinas nas rúas da Cidade Vella, antes e despois dos momentos de oración. Tamén irromperon en numerosas ocasións na explanada e no interior de Al Aqsa, co obxectivo de levar a cabo interrogatorios, controis de documentación ou intimidar a crianzas e adultos que estaban a orar e descansar. O xornalista palestino Hamza Hamdan e o estudante da Universidade de Birzeit Mohammed Al-Tamimi foron arrestados o 1 e o 8 de abril respectivamente, pero non foron as únicas persoas detidas ás portas da explanada ou dentro. Os días 24, 25 e 29 de marzo, pola noite, a policía entrou na explanada das mesquitas e deron orde de evacuación. As expulsións aleatorias son un exemplo máis da hostilidade do poder ocupante, que usa diferentes tácticas de violencia e humillación. Na madrugada do 5 de abril o exército usou drons para lanzar gas lacrimóxeno sobre as persoas que estaban no patio da mesquita. Os colonos israelís, que de forma habitual entran na explanada protexidos con escolta policial, participaron en diferentes actos de provocación durante o Ramadán. O extremista Ben Gvir, Ministro de Seguridade Nacional, animou publicamente aos colonos a irromper en Al Aqsa nos últimos días do mes sagrado musulmán. Pascua: sen cristiáns de Cisxordania O Lume Sagrado é unha celebración que ten lugar cada ano na igrexa do Santo Sepulcro en Xerusalén durante o Sábado Santo, un día antes da Pascua ortodoxa. O Lume de Pascua distribúese aos fieis durante a misa e transpórtase ao resto de localidades palestinas, así como a países ortodoxos. Este ano a cerimonia tivo lugar o 4 de maio e estivo marcada polas medidas de represión das forzas de seguridade israelís, que estableceron polo menos 13 postos de control no casco antigo de Xerusalén e pecharon rúas con barreiras de ferro. Só se permitiu a entrada á igrexa a palestinos cristiáns con residencia na Cidade Vella e aos estranxeiros. A diferencia do resto de anos, á comunidade cristiá de Cisxordania non se lle concedeu ningún permiso durante a Pascua. Jeries, cristián de Ramallah, explica que mesmo amigos del de Xerusalén "preferiron non participar nas celebracións, porque os soldados poden interrogarte e agredirte". Jeries adoita solicitar un permiso a Israel para cruzar o posto de control de Qalandia. "Este ano non puiden ir e é difícil. Non se trata só de relixión, é o noso patrimonio, Historia de Palestina". Issa, tamén cristián, aclara que non é a primeira vez que se denega o acceso ao Santo Sepulcro a persoas cristiás palestinas. "Estas restricións son parte da política non escrita de Israel para asegurarse de que os cristiáns sufran abondo para que se vaian. O obxectivo é apropiarse de todas as terras e propiedades das igrexas cristiás".