A represión contra Imran Khan marca as eleccións hoxe en Paquistán

Un total de 128 millóns de paquistanís están convocadas e convocados hoxe a votar nunhas eleccións lexislativas nacionais e rexionais consideradas amplamente como non xustas pola influencia das Forzas Armadas, que gobernaron directamente o país ao longo de máis de tres décadas desde que alcanzou a independencia en 1947. Nos últimos anos, esta influencia traduciuse nunha represión masiva contra o ex primeiro ministro Imran Khan e o seu partido, o centrista Movemento pola Xustiza (PTI), a partir da súa destitución por parte do lexislativo en 2022. Khan acusou os Estados Unidos de instigar a súa saída do Executivo en colaboración cos militares pola neutralidade do país no tocante á invasión rusa de Ucraína, e polo seu achegamento a Rusia e á China. Un documento diplomático filtrado revela que pouco antes da moción de censura na súa contra, dous diplomáticos do Departamento de Estado estadounidense reuníronse co embaixador paquistaní en Washington, ao que transmitiron que “se o voto de censura contra o primeiro ministro ten éxito, todo será perdoado”, en alusión á "preocupación" pola posición “tan agresivamente neutral” ao respecto da guerra. No marco da represión contra o ex mandatario, que se intensificou logo de desatarse protestas por todo o territorio paquistaní ao ser detido en maio de 2023 (antes de ser liberado e novamente arrestado en agosto), foi condenado a 10 anos de prisión a pasada semana acusado de divulgar o contido do cable. A Xustiza paquistaní condena Khan a 10 anos de cárcere poucos días antes das eleccións Persecución sistémica Nos últimos días foi sentenciado a 14 anos de cadea por presuntamente vender agasallos feitos ao Estado e a outros sete por matrimonio fraudulento, e en agosto xa recibira un veredicto de tres anos pola venda de obsequios estatais. Estas resolucións son apenas unha pequena fracción das 150 causas en marcha contra el e que Khan atribúe a unha persecución para tratar de impedir a súa vitoria electoral. O certo é que despois das protestas de maio milleiros de persoas e múltiples cargos do PTI foron arrestados, introducíronse os xuízos militares para civís e lanzouse unha nova ofensiva contra a formación. Nese sentido, a Xustiza prohibiu a participación nos comicios do PTI e o uso do seu logo, polo que todas as súas candidaturas teñen que presentarse como independentes, entre denuncias de que lles foron asignadas imaxes con vínculos sexuais ou co consumo de alcol para minimizar o seu apoio. Tamén se lle retirou a potestade de presentar candidaturas aos escanos reservados, 70 dos 336 asentos na Asemblea Nacional para minorías e mulleres. A isto hai que engadir o arresto de persoas candidatas do partido, a persecución dos seus actos electorais, o fechamento do seu portal ou páxinas de internet que permitían informarse sobre as súas candidaturas ou as instrucións remitidas aos equipos xornalísticos que cubriron a campaña por parte dos militares para que censuraran calquera información sobre Khan e o PTI. Non hai maneira de que “o partido de Khan poida gañar” malia a súa popularidade, admite Noreen Khan, unha traballadora de Islamabad, a capital, que vota por primeira ocasión. Nestas circunstancias, diversas entidades en defensa dos dereitos humanos desbotan tamén que se trate dunhas eleccións xustas ou libres, e explican que a represión contra Khan incrementou o sentimento antisistema, advertindo que unha baixa participación impactaría aínda máis na falta de credibilidade dos comicios. Até 70% da poboación non ten confianza no proceso electoral, desvelou unha enquisa de Gallup. Paquistán lanza un ataque de represalia contra territorio iraniano 24 horas despois de ser bombardeado A traxectoria de Khan -que en 2018 foi o unxido polos militares- nos últimos meses é antagónica á de Nawaz Sharif, da conservadora Liga Musulmá de Paquistán. Todo indica que Sharif é o seleccionado polas Forzas Armadas para converterse en primeiro ministro por cuarta vez. Após catro anos en Londres para fuxir de varias sentenzas de prisión por corrupción, o multimillonario Sharif volveu a Paquistán en outubro, poucas semanas antes de que as condenas contra el fosen anuladas. O seu irmán Shehbaz desempeñouse como primeiro ministro após a destitución de Khan. A campaña estivo marcada pola violencia. Un total de 28 persoas morreron hoxe en varias explosións en Baluchistán, no suroeste paquistaní, contra distintos candidatos, un deles do PTI. Ademais das operacións das forzas soberanistas baluchis, unha das principais preocupacións de seguridade é a reactivación dos atentados dos talibán paquistanís. Asemade, a crise económica continúa a impactar no territorio, cunha inflación en arredor de 25% que se suma á caída do valor da rupia, que cedeu un 50% desde 2021. A alza das mercadorías básicas no mercado internacional afectou especialmente á poboación, nun Estado que evitou a bancarrota en 2023 cun acordo co Fondo Monetario Internacional por 2.800 millóns de euros. O cambio climático foi chave para a situación das finanzas de Paquistán, que aínda non se recuperou das inundacións de 2022, nas que un terzo do país ficou baixo a auga e nas que morreron unhas 1.700 persoas. O Supremo de Paquistán permite a candidatura de Nawaz Sharif Aumenta a tensión entre Islamabad e os seus veciños Paquistán é o segundo Estado de maioría musulmá con máis poboación no mundo, e un dos nove países do planeta que conta con armas nucleares, así como un “aliado occidental imprevisíbel”, sostén a axencia AP. Amais, o enfrontamento permanente coa India, con Caxemira como eixo central, determinou a política de alianzas de Islamabad, próximo a Turquía, Arabia Saudita e á China, canda Washington o seu maior provedor de armas. Tras a vitoria dos talibán, impulsados por Paquistán e os Estados Unidos, contra o Goberno socialista afgán, o país asiático foi un dos tres que recoñeceu o novo Executivo, o que deu paso a unha situación de maior tensión cando os talibán volveron ao poder en 2021. Máis de 345.000 afgáns e afgás fuxiron de Paquistán nos últimos meses ao iniciar as autoridades unha persecución das persoas migrantes sen regularizar, o que foi interpretado como unha presión cara a Kabul para que free os ataques dos talibán paquistanís desde o outro lado da fronteira. En xaneiro, tamén aumentou a voltaxe con Irán, que atacou un grupo soberanista no territorio baluchi encadrado en Paquistán aducindo a falta de accións de Islamabad, que contestou bombardeando as posicións dunha organización baluchi en Irán.