Todo é posíbel no Líbano

Mentres Israel continúa o seu brutal asalto en Gaza e acelera a súa escalada en Cisxordania, medra o temor a unha expansión rexional do conflito. Desde que Israel iniciou as hostilidades contra Gaza, unha serie de actores apoiados por Irán, agrupados no "Eixo da Resistencia", saíron en apoio do pobo palestino con ataques sobre Israel ou os seus intereses na rexión. Especialmente preocupante é a situación na fronteira norte de Israel, onde o conflito entre a milicia libanesa Hezbollah e Israel causou a evacuación de 200.000 persoas a ambos os dous lados da fronteira e a morte de 646 persoas no Líbano e 50 israelís. Se ben a confrontación estivo limitada en gran medida á área fronteiriza e ambas partes deixaron claro que non están interesadas nunha escalada, calquera erro de cálculo podería desatar a guerra a grande escala e envolver a rexión enteira nun conflito con consecuencias imprevisíbeis. Israel quere evitar abrir unha segunda fronte mentres prosegue o asalto en Gaza e Hezbollah, que promete continuar os seus ataques contra Israel até que remate a agresión na Faixa, é consciente de que as consecuencias dunha guerra serían catastróficas para o Líbano, un país sumido nunha profunda crise política, económica e social. Hezbollah fronte a Israel Mais o enfrontamento intensificouse recentemente, no marco dunha crecente tensión nunha rexión que agarda a resposta iraniana ao asasinato do xefe de Hamas Ismail Haniyeh en Teherán o pasado mes de xullo. Mentres Israel vén golpeando máis profundo no Líbano e aumentando os asasinatos e ataques, Hezbollah incrementou a presión non só para respostar ao asasinato dos seus comandantes e disuadir Israel dunha ofensiva, senón tamén para reforzar a posición negociadora de Hamas nas conversas para o cesamento do fogo. A posibilidade dunha gran ofensiva israelí no Líbano, que conta co respaldo da maioría da poboación israelí, é real, en calquera momento. Netanyahu ten interese en continuar o conflito en virtude dos seus intereses persoais e políticos e quere expulsar Hezbollah do sur do Líbano, por medios diplomáticos ou pola forza, para garantir o retorno e a seguridade das decenas de milleiros de israelís que foron evacuados desde o inicio das hostilidades. Mais Israel sufriu experiencias dolorosas no Líbano no pasado, país que invadiu en 1978 e 1982 durante a guerra civil libanesa. Nese contexto xorde Hezbollah, en 1982, un movemento xiíta apoiado por Irán para enfrontar a ocupación israelí do sur do Líbano. No 2000 as tropas israelís retíranse tras 18 anos de ocupación e Hezbollah proclámase como o primeiro exército árabe que forza Israel a ceder control de territorio. No ano 2006 unha guerra, que causa moitas mortes e enormes danos na infraestrutura civil do Líbano, amosa novamente a capacidade de Hezbollah para facer fronte ao exército israelí. O conflito, que supón un erro militar e estratéxico para Israel, provoca a morte de 165 israelís e 300.000 desprazados en Israel. Desde entón Hezbollah converteuse nunha organización moito máis poderosa, reforzando a súa influencia rexional e as súas capacidades de combate e o seu arsenal de armas. Considerada unha organización terrorista por EEUU e outros países occidentais, representa a maior ameaza militar para Israel e está considerada como un dos grupos paramilitares máis poderosos do mundo, unha milicia cunha capacidade militar moi superior que Hamas, a quen Israel non foi quen de derrotar tras un brutal asedio de 12 meses nun enclave totalmente cercado. Maior inestabilidade Un gran conflito entre Hezbollah e Israel tería importantes efectos para Israel. Hezbollah, un dos bloques políticos máis influentes no Líbano, ten decenas de milleiros de combatentes, con experiencia na guerra civil siria, un arsenal de decenas de milleiros de mísiles capaces de golpear as cidades israelís e unha gran flota de modernos drons. Israel ten o exército máis poderoso de Oriente Medio e o vital apoio de EEUU, mais pode pagar un alto prezo e orixinar repercusións inesperadas de longo termo, como aconteceu no pasado. Unha intervención israelí podería avivar as tensións políticas e sociais existentes no Líbano e provocar un estado de inestabilidade, para Israel tamén, dada a previsíbel chegada de grupos armados procedentes do exterior. Amais, unha escalada podería desencadear un conflito rexional moito maior de consecuencias imprevisíbeis coa participación de diferentes grupos aliñados con Irán, sen descartar da mesma Irán e de EEUU. Nun escenario con múltiples incógnitas e variábeis só existe a certeza de que todo é posíbel. *Este artigo foi escrito e entregado antes da explosión coordinada de 'buscas' de Hezbollah que causou unha decena de mortos e 3.000 persoas feridas.