Venezuela convoca o embaixador español en Caracas e chama a consultas a súa representante diplomática en España
O ministro de Exteriores de Venezuela, Yván Gil, vén de anunciar a súa decisión de convocar o embaixador español en Caracas, Ramón Santos Martínez, e de chamar a consultas a súa representante diplomática en España, Gladys Gutiérrez, como resposta ás "insolentes, inxerencistas e groseiras" declaracións da ministra de Defensa española, Margarita Robles, que se referiu ao Goberno de Nicolás Maduro como unha "ditadura".
"O Goberno da República Bolivariana de Venezuela, ante as insolentes, inxerencistas e groseiras declaracións da ministra española Margarita Robles, que apuntan a unha deterioración das relacións entre ambos os dous países, decidiu chamar a consultas á embaixadora venezolana acreditada ante o Reino de España, Gladys Gutiérrez", reza un comunicado de Gil publicado na súa conta da rede social Facebook.
Gil tamén indicou que o embaixador español deberá comparecer esta mesma sexta feira na sede do Ministerio do Poder Popular para as Relacións Exteriores.
Robles realizou estas declaracións durante a súa intervención durante o acto de presentación da novela de Julia Navarro O neno que perdeu a guerra, onde ademais lembrou a todos os homes e mulleres venezolanos que "tiveron que saír do seu país".
Escalada da tensión
Por outra parte esta quinta feira a Asemblea Nacional de Venezuela deu os primeiros pasos para avanzar na solicitude de que o Goberno de Maduro rompa relacións co Estado español, tal e como demandou o seu presidente Jorge Rodríguez.
O desencontro entre Venezuela e o Estado español precipitouse esta semana, tras a aprobación, esta cuarta feira no Congreso dos Deputados, dunha proposición non de lei impulsada polo PP que insta o Goberno de Sánchez a recoñecer o candidato opositor Edmundo González Urrutia como presidente electo de Venezuela.
A iniciativa do Partido Popular foi adiante cos votos a favor do seu grupo parlamentaria, de Vox, Coalición Canaria e Partido Nacionalista Vasco.