VÍDEO | A extrema dereita portuguesa recibe Lula da Silva con berros de "ladrão" no 25 de Abril
O presidente do Brasil, Luiz Inácio Lula da Silva foi apupado polos deputados da extrema dereita portuguesa durante unha sesión especial da Assembleia da República en conmemoración do 25 de Abril, día da Revolução dos Cravos.
No día en que hai 49 anos a sociedade portuguesa derrotou a ditadura fascista de Salazar, o máximo mandatario do Brasil foi convidado para dar un discurso. Algo que os deputados do Chega, partido de extrema dereita liderado por André Ventura, non viron con bos ollos.
O incidente provocou a intervención do presidente da Asembleia. “Chega de insultos e de degradar as institucións”, manifestou Augusto Santos Silva.
Algo ao que os deputados da extrema dereita respondían con “Lula, ladrão, o teu lugar é a prisão” mentres sostiñan cartaces con bandeiras de Ucraína.
Resposta de Lula
Pola súa parte, o presidente do Brasil respondía con calma a esta escena indicando que “É preciso estar afeito a este tipo de coisa quando se faz política” e cualificou de “ridículo espetáculo” o protagonizado pola extrema dereita portuguesa.
“A democracia no Brasil passou recentemente por momentos de séria ameaça. [...] A notícia que trago é que as forças democráticas brasileiras mostraram sua força e resiliência”, afirmou o máximo mandatario brasileiro.
Pola contra, o líder do Chega respondeu unha vez terminada a sesión na Assembleia da República: “Habituem-se porque esta forma de oposição vai continuar”, manifestou.