Von der Leyen, do Partido Popular Europeo, defende un pacto coa ultradereita para gobernar a Comisión Europea

O austríaco Walter Baier (A Esquerda), o italiano Sandro Gozi (da liberal Renovar), a alemá Ursula von der Leyen (Partido Popular Europeo, PPE), a tamén alemá Terry Reintke (Os Verdes) e o luxemburgués Nicolas Schmit (Socialistas e Demócratas, S&amp;D) protagonizaron a quinta feira o debate 'Eurovisión', que decorreu no Parlamento Europeo entre as e os candidatos principais designados polos grupos políticos para ocupar a Presidencia da Comisión Europea, un cargo que só ten opcións reais de alcanzar Von der Leyen, que o asumiu en 2019, despois das eleccións ao lexislativo da UE entre o 6 de 9 de xuño. A Unión Europea de Radiodifusión (UER), que organizou o evento, excluíu do debate a Alianza Libre Europea (ALE), na que se enmarcan o Bloque Nacionalista Galego (BNG) ou Esquerra Republicana de Catalunya (ERC). A entidade denunciou que a finais de abril a UER comunicoulle que decidiu fixar unhas normas que estabelecen que por cada grupo parlamentario só podería participar unha persoa. No lexislativo comunitario, a ALE e Os Verdes comparten grupo (ALE-Os Verdes). A ALE incidiu en que a imposición de “regras e limitacións arbitrarias” non “só é antidemocrática senón que tamén constitúe unha clara interferencia nas eleccións europeas”, especialmente por parte dunha “entidade externa” á UE como a UER, que aduciu que o grupo ALE-Os Verdes designou Reintke. Tampouco estiveron, mais por decisión propia, os dous grupos da extrema dereita, o dos Conservadores e Reformistas (ECR) por unha banda, no que se encadra a ultraespañolista Vox ou Irmáns de Italia, a formación da primeira ministra Giorgia Meloni, e Identidade e Democracia (que conta co francés Reagrupamento Nacional de Marine Le Pen ou coa italiana Liga, de Matteo Salvini), ID. A UER trasladou que non nomearon candidato principal. A pesar da súa ausencia, a ultradereita foi un dos eixos sobre o que pivotou o debate. Schmit advertiu Von der Leyen de que os acordos con estes grupos son unha liña vermella para apoiar a súa candidatura. Tamén Gozi abordou este aspecto, mais admitiu que até despois das eleccións Renovar non tratará a entrada dun dos seus membros, o neerlandés Partido Popular pola Liberdade e a Democracia (VVD), nun goberno coa extrema dereita do Partido pola Liberdade (PVV) de Geert Wilders, que pertence a ID, algo que lle cuestionou Baier, que fixo énfase en que “temos que conseguir traballos seguros, vivenda e unha situación social digna para a xente ou non imos derrotar a extrema dereita”. Reintke tratou de circunscribir a extrema dereita a “políticos que están traballando” con Rusia e a China, a pesar de que a maioría destas forzas con presenza nos seus respectivos Gobernos están aliñadas a nivel exterior coa UE. Na súa quenda, Von der Leyen ratificou que contará coa extrema dereita, delimitando a colaboración a “deputados que sexan pro Europa [en alusión á UE], pro Ucraína, e dicir anti [o presidente ruso Vladimir] Putin, e en terceiro lugar a favor do Estado de dereito”. Ao ser inquirida directamente por Meloni e a súa formación, asegurou que “cumpren estes criterios”, xustificando a decisión en que o lexislativo da UE “é moi distinto dos Parlamentos” estatais e “hai que construír unha maioría”. Até o de agora, foi a alianza entre PPE e S&amp;D a encargada de xestionar a UE. Ucraína Outro dos temas que centraron o debate foi o referente a Ucraína, no que a unanimidade ao respecto de continuar armando Kíiv e impulsar a industria armamentística na UE foi rachada por Baier, que subliñou que “a ameaza máis inmediata para a seguridade é o desastre ecolóxico ao que nos estamos a achegar”, detallando que a Organización do Tratado do Atlántico Norte (OTAN) gasta en defensa tres veces máis que Rusia e a China. Tamén preguntou cando van condonar “os millóns de euros” que debe Ucraína para “loitar pola nosa liberdade”, cuestionando a falta de mencións a Palestina. “Cando chegarán as sancións europeas contra Israel?”, insistiu. Tras ser preguntado pola súa negativa á expansión da OTAN, destacou que a seguridade debe basearse nun sistema colectivo de seguridade que implique unha redución global dos armamentos. En paralelo ao transcurso do debate, o catalán Raül Romeva, candidato principal da ALE canda Maylis Roßberg, da minoría danesa en Alemaña, difundiu que coincidía en que implementar “o paquete climático non é unha prioridade, é a prioridade”, defendendo que os sectores produtivos non teñan que ser os “únicos” que carguen co custo da transición ecolóxica. Arredor desta cuestión, Reintke reclamou unha reforma da política agraria común, cunha mudanza “da maneira na que se reparten os subsidios”, Schmit solicitou mobilizar máis recursos e Baier instou a pór fin ás medidas de control de gasto social, pois impiden que esta transición vaia ligada á xustiza social. Unha enquisa difundida a quinta feira por Euronews apunta que a dereita e a extrema dereita terán a maioría. Dos 720 asentos o PPE quedaría con 182, por 82 de ID e 80 de ECR, que poderían alcanzar a absoluta con apoios dalgunhas das 63 deputadas e deputados independentes. Pola súa parte, S&amp;D ficaría con 133, Renovar con 79, ALE-Os Verdes con 57 e A Esquerda con 44. O PSOE iniciou a campaña en València e o PP en Barcelona Na medianoite da quinta á sexta feira está fixado o comezo no Estado español da campaña electoral de cara aos comicios ao Parlamento Europeo, que se desenvolverán o 9 de xuño. Poucas horas antes, as principais formacións estatais convocaron os seus actos de inicio de campaña. O PSOE elixiu València, nun acto no que o presidente español, Pedro Sánchez, acompañou a súa candidata, a vicepresidenta terceira e ministra de Transición Ecolóxica Teresa Ribera. En cambio, o Partido Popular (PP) apostou por Barcelona, onde estivo o seu líder, Alberto Núñez Feixoo, coa candidata, Dolors Montserrat. Entrementres, Vox iniciou a campaña en León, co seu presidente, Santiago Abascal, arroupando Jorge Buxadé. Á vez, Sumar escolleu Madrid, nun acto no que participou a vicepresidenta segunda e ministra de Traballo, Yolanda Díaz, coa candidata Estrella Galán. Os comicios son determinantes para o grupo, que se enfrontará a Podemos, que busca manter a súa representación. ERC e EH Bildu, que comparten candidatura co BNG en Agora Repúblicas, empezaron a campaña en Badalona e Bilbo respectivamente. En paralelo, Junts comezou na capital catalá e o Partido Nacionalista Vasco (Coalición por unha Europa Solidaria), en Hondarribia.