Votar non serve de nada e todos son iguais

Hai pouco máis dun ano, entre todas as comunidades autónomas que estaban chamadas ás urnas, o País Valencià tamén foi votar. O resultado marcou o punto e final para o ciclo de cambio político que viviramos desde maio de 2015, cando as urnas permitiron acabar coas dúas décadas de gobernos do PP. Dúas décadas de desgoberno, recortes e diñeiro público que se retiraba da construción de escolas para acabar nos petos dos responsábeis políticos do País Valencià en casos de corrupción que chegan ata hoxe en día. Esta semana cumpriuse un ano daquelas eleccións e, uns dez meses despois da constitución do goberno da Generalitat Valenciana con PP e Vox á fronte, temos algúns datos que me gustaría reflectir para aqueles que se afanan en ocupar o imaxinario colectivo de que votar non serve para nada ou que todos son iguais. Tamén para aqueles que absorbidos por ese imaxinario decidiron a súa participación electoral hai un ano. Menos investimento En só dez meses deixáronse de investir uns 800 millóns de euros en servizos públicos esenciais, na mellora da economía, no medio ambiente, agricultura ou cultura. 80 millóns de euros cada mes que non van mellorar a vida dos valencianos e valencianas. O detalle é arrepiante, especialmente para as persoas que cremos que o Estado de benestar e os seus servizos públicos fortes e de calidade son bens prezados que temos que coidar coma se nos fose a vida niso. Coma se se nos fose non, porque efectivamente a vida vai niso. Votar serve para que 800 millóns de euros públicos sexan investidos en xerar sociedades máis igualitarias Na educación pública invístense 337 millóns de euros menos que co anterior goberno. O PP e Vox prescinden do profesorado e paralizan a construción de escolas públicas. Agora mesmos 3.000 profesores e mestres da educación pública valenciana non empezarán o curso escolar en setembro de 2024. 3.000 profesores que incrementara Compromís nos seus últimos meses á fronte da Consellería de Educación, aos que se ían a sumar 2.000 máis que prevía incorporar en setembro de 2024. Mentres tanto, o orzamento para a construción de centros educativos está paralizado despois de recortar 122 millóns de euros. Por certo, en dez meses o Goberno de PP e Vox xa tivo a súa primeira folga xeral educativa cun seguimento bastante digno. A cultura, en mans dun toureiro de Vox, foi recortada en 10 millóns de euros. Na sanidade pública, o PP e Vox esfórzanse en condonar a débeda ás empresas que xestionaron a sanidade privada con 90 millóns de euros, mentres recortan 32 millóns de euros en persoal sanitario e bloquean a construción e mellora de infraestruturas. A saúde vai niso, neste caso literalmente. No peor momento da crise ambiental e sufrindo os efectos máis adversos do cambio climático, entrando no peor verán do histórico recente, o Goberno valenciano do PP e Vox recorta 15 millóns de euros na prevención de incendios. Nunhas semanas botarémonos as mans á cabeza cando se nos queimen os principais pulmóns verdes e naturais do País Valencià. Fortalecer os servizos sociais Poñer uns partidos ou outros no goberno marca unha gran diferenza: potenciar unha sanidade universal ou desmantelar a sanidade pública; construír colexios e investir en docentes para a educación pública ou eliminar ao máximo os recursos; coidar o territorio e investir en prevención de catástrofes naturais e forestais ou acabar cos nosos recursos naturais. A lista de comparacións pode ser interminable. Un ano despois das eleccións autonómicas valencianas e dez meses despois da constitución do Goberno de PP e Vox na Generalitat Valenciana, a práctica é a mellor forma de combater a idea de que "votar non serve para nada". Votar e, polo tanto, que se vota, serve para que 800 millóns de euros públicos sexan investidos en xerar sociedades máis igualitarias, en traballar na colectividade, en poñer as persoas no centro e fortalecer uns servizos públicos de calidade e universais, ou para que eses 800 millóns de euros vaian a empresas privadas que mercantilizan a vida, como as empresas encargadas da privatización da sanidade valenciana. Quédannos tres anos para volver votar: tres anos para tentar frear desde as rúas os dereitos que o PP e Vox desde as súas ideas excluíntes de xestión nos queren arrebatar; tres anos para desmontar mantras como que votar non serve para nada ou que todos os políticos son iguais.