Zelenski viaxará a Madrid para asinar un "acordo bilateral de seguridade" con Sánchez

O presidente de Ucraína, Volodimir Zelenski, visitará o Madrid en datas próximas para manter unha nova xuntanza co seu homólogo español, Pedro Sánchez, para asinar un "acordo bilateral de seguridade", un trámite que xa ratificaron outros países como Reino Unido, Alemaña, Francia ou Italia.

Preguntado ao respecto, o ministro de Exteriores, José Manuel Albares, evitou concretar a data do encontro e limitouse a afirmar que, ante a "guerra inxusta e inxustificada" que se está a producir en territorio ucraíno, o Goberno español seguirá apoiando Ucraína "todo o tempo que sexa preciso".

Zelenski xa visitara o Estado español o pasado mes de outubro para participar no cumio da Comunidade Política Europea, integrada pola práctica totalidade dos países europeos —membros ou non da UE—, en Granada. Naquel evento a presidenta da Comisión Europea, Ursula von der Leyen, advertira aos xefes de Estado e de Goberno da "obriga" dos líderes do continente de axudar Ucraína fronte ao "uso da forza de Rusia", que "ameaza a arquitectura da seguridade construída por Europa".

Fontes diplomáticas citadas por RTVE precisan que este pacto de seguridade entre España e Ucraína comezou a fraguarse a principios de marzo e agora xa estaría rematado e aprobado o texto, que se prevé que reciba proximamente o visto e prace do Consello de Ministros mais non que pase polo Congreso, ao non ter o status de tratado internacional.