Sombreiros diversos

Pinto &amp; Chinto, unidos dende 1993, volven cun álbum ilustrado que tanto pode ler a cativada como as persoas maiores, pois nel atopamos o señor Martus, un fabricante de sombreiros que deseña e constrúe os sombreiros máis extravagantes, e detrás dos que atopamos unha variedade de seres e de formas de entender o mundo. Acaso non vos parastes a pensar que agochan os puchos das vosas amizades ou mesmo de calquera que pasee pola rúa? Onde os mercarían? Canto lles custarían? Queda ben co seu estilo? Por que o levan posto? Que vivirían con eles? Pois esta obra dá resposta a todas estas inquedanzas, de xeito que as que nos achegamos a ela podemos descubrir que hai tantos tipos de persoas coma de sombreiros. Indo un pouquiño máis alá, O fabricante de sombreiros é unha fermosa fábula e unha reivindicación da diversidade. Cun estilo colorista, e na liña do que nos teñen acostumados esta parella artística conformada por Carlos López e David Pintor, a obra ten múltiplas lecturas. Vénme á cabeza, por exemplo, esa capacidade do señor Martus para imaxinar e facer realidade os sombreiros máis disparatados, como un con forma de tellado para a choiva, outro á maneira dunha nube para protexerse do sol e con chuvia incorporado, outro de palla para labregos do que xerminan espigas cheas de gran, un de froitas no que a froita non caducaba nunca e permanecía sempre fresca, un de pel de coello que se mete el só na sombrereira, un de pelo de castor, un de músico da rúa coas moedas xa incorporadas… O libro é, tanto nos textos de Carlos Lopez como nas ilustracións de David Pintor, un canto de amor cara ás persoas, cara á humanidade, e por iso tamén está moi presente o humor como cando se di que “fabricou un sombreiro de la tan perfecto que beaba e se o contabas moitas veces quedabas durmido” ou “fabricou un sombreiro para nenos que tamén medraba co tempo, e así sempre era da súa medida”. Pero, sobre todo, reclama a imaxinación como ese mecanismo a través do cal poden suceder as cousas máis incribles. Esa maxia dos libros e das palabras, esa imaxinación grazas á que pode acontecer todo. En definitiva, unha obra de arte ideal para gozar en familia, para ler nos días máis baixos, para botar un sorriso, para lembrar o importante e para inocular o virus da imaxinación.