BNG lembra ao secretario xeral de Política Lingüística os constantes “incumprimentos” da Xunta
Valentín García informou no Parlamento do Plan de dinamización da lingua galega no tecido económico 2015-2020. A deputada nacionalista Ana Pontón amosou as súas dúbidas sobre a vontade de cumprimento dese plan á vista da vulneración “de acordos e leis” en materia lingüística pola Xunta.
O secretario xeral de Política Lingüística da Xunta, Valentín García, informou no Parlamento de Galiza do 'Plan de dinamización da lingua galega no tecido económico 2015-2020', un plan sobre cuxo cumprimento o BNG xa expresou as súas dúbidas por boca da deputada Ana Pontón. A parlamentar nacionalista lembrou os “moitos acordos” incumpridos nesta materia polo Partido Popular e cualificou de “burla” ao sistema democrático que o Goberno “vulnere sistematicamente os acordos e as leis”.
Ademais, Pontón tamén fixo referencia aos “incumprimentos” dos mandatos establecidos por lei e dos acordos parlamentarios entre os que destacou a obriga do Goberno de remitir ao Parlamento un informe de avaliación da lei Paz Andrade que substituíu, dixo, por unha comparecencia que non achegou ningún dato nin información. O Goberno, recalcou Pontón, incumpre a lei ao igual que incumpre o Plan de Normalización Lingüística aprobado no ano 2004 aprobado por unanimidade e coa obriga da Xunta a establecer “mecanismos de seguimento, control e avaliación informando con regularidade ao Parlamento”, afirmando que “levamos toda unha lexislatura sen cumprir con esta resolución”. O Plan presentado polo secretario xeral é “un corta e pega” do presentado no ano 2004, dixo a parlamentar, co agravante, puntualizou, que non conta “cunha memoria económica financeira”. Onde se aprobou este plan e con que contía preguntou a deputada porque acaban de ser aprobados os Orzamentos e non existe ningún incremento na Secretaría de Política Lingüística para o plan presentado nesta terza feira.
O BNG reiterou que o PP “aínda non rectificou” un discurso que lle fixo moito dano a lingua galega, “agresivo e que pon a vítima como verdugo” ademais de alimentar os prexuízos contra o galego argumentando que todas as medidas no ámbito da normalización lingüística “son unha imposición” e que poñen en perigo o castelán na Galiza.
84 medidas
O secretario xeral de Política Lingüísticadefendeu as 84 medidas propostas pola Xunta no Plan de Dinamización do galego no ámbito económico, que cualificou de "realistas", e avanzou que a previsión é destinar a este proxecto máis de 6,3 millóns de euros até 2020. Valentín García informou que a participación de 314 entidades na conformación deste texto.