Palabras con memoria: haiche de todo
Chavellar.- Tocar ou mover unha cousa sen orde. Argallar, remexer.
Lugar de escoita.- Seivane (Lugo).
Fonte.- María Teresa Castro Novo (nai de Alejandro Martínez Castro).
Outros apuntamentos.- Enviada por Juncal Martínez, do IES Leiras Pulpeiro de Lugo.
Chonar.- Confundir.
Exemplo.- “O demo te chone!”
Lugar de escoita.- Castro, Valdoviño (Ferrolterra).
Fonte.- Eva Seoane Martiño.
Gamada.- (Ademais de significados rexistrados) Bocadela de aire que se aspira dun cigarro.
Exemplo.- “Deulle unhas gamadas ao pito antes de tiralo.”
Lugar de escoita.- O Morrazo.
Fonte.- Manuel Durán.
Outros apuntamentos.- Pronúnciase con gheada. Grupo Maré do Morrazo, formado por Salvador Castro Otero, Lucía Durán Paredes, Xosé Manuel González Barreiro, Henrique Harguindey Banet, Xosé Martínez García, Ramón Rocamonde Gómez e María Emma Tilves Pazos.
Parrallada.- Cousa de mal gusto.
Lugar de escoita.- Muxía.
Fonte.- Proxecto Buserana de Muxía.
Quenquén.- Mentira.
Exemplo.- “O que me dis é de verdade ou de quenquén.”
Lugar de escoita.- Vimianzo (Costa da Morte).
Fonte.- Xosé Gándara.
Outros apuntamentos.- A fonte di que se trata dunha palabra usada na linguaxe infantil e que un grupo de teatro de Camariñas levaba (ou leva) ese nome: Teatro do quenquén.