A maioría absoluta do PP no Senado rexeitou esta cuarta feira unha iniciativa de ERC, EH Bildu, BNG, Compromís e Geroa Bai que pretendía reformar o Regulamento da Cámara para universalizar o uso das linguas oficiais distintas ao español, como xa ocorre no Congreso desde esta lexislatura.
Así, varios socios do Goberno uníronse no Senado para presentar a súa proposta de reforma do regulamento para modificar algúns artigos co obxectivo de ampliar o uso do catalán, o occitano, o euskera e o galego para equiparalos aos do Congreso tras o acordo co PSOE e as formacións independentistas.
O que expuñan desde ERC e o resto de formacións é que, entre outras cousas, non fose necesario acompañar o texto en castelán nos escritos presentados ante a Cámara Alta, ou que os senadores poidan utilizar as linguas oficiais de cada territorio na fórmula para xurar ou prometer a Constitución.
Así mesmo, pedían que as actas e os documentos dos distintos órganos da Cámara estivesen en calquera das linguas oficiais do Estado, que os grupos tamén puidesen pór unha denominación na súa lingua oficial, así como utilizar estas linguas en calquera debate.
Uso limitado
Na actualidade, o uso das linguas oficiais distintas do español no Senado está limitado aos debates das mocións no Pleno, a Comisión Xeral das Comunidades Autónomas e a presentación dalgúns textos escritos.
Na lexislatura pasada, na que o PSOE sumaba maioría con varios aliados do Goberno, os socialistas apoiaron admitir a trámite unha proposta de Junts de reforma do Regulamento para universalizar o uso das linguas minoritarias no Senado.
Con todo, os socialistas realizaron varias ampliacións do período de emendas a esta proposta, dilatando a súa tramitación no Senado sen que finalmente se levase a cabo.
Neste contexto, o adianto electoral e a disolución das Cortes provocaron que esta proposta para estender o uso das linguas oficiais dos territorios históricos quedase sen efecto.
