O Concello de Santiago celebra un acto institucional en lembranza de Ánxel Casal
O Pazo de Raxoi acollerá esta segunda feira, 19 de agosto, ás 13 horas, un acto institucional en lembranza do alcalde republicano Ánxel Casal, en recoñecemento á súa memoria e á de todas as persoas que foron represaliadas canda el por loitar pola liberdade e a democracia.
Nesta homenaxe, que se realiza por segundo ano consecutivo no Salón Nobre de Raxoi, participarán representantes dos concellos de Santiago de Compostela, de Teo e de Arzúa co obxecto de visibilizar os lugares que marcaron os momentos finais da súa vida e da súa loita. Así, están previstas intervencións da alcaldesa de Santiago, Goretti Sanmartín, do alcalde de Arzúa, Xoán Xesús Carril; e do concelleiro de Teo Juan Jesús Cerqueiro.
Igual que o ano pasado, están convidadas as corporacións municipais dos tres concellos, así como persoas e entidades que realizan actividades relacionadas coa Memoria Histórica.
Este acto institucional ten por finalidade honrar a dignidade colectiva das persoas que loitaron a prol da liberdade e da democracia e que foron represalias tras o golpe do 36, e nomeadamente a figura de Ánxel Casal, asasinado o 19 de agosto dese mesmo ano en Cacheiras.
A traxectoria política de Ánxel Casal estivo estreitamente vinculada a un intenso labor cultural, a través da súa faceta de impresor e editor e do impulso á normalización da lingua galega. Tanto el como a súa muller, María Miramontes, tiveron unha importancia destacada en diversos proxectos tanto para Santiago como para o conxunto do país, como proba a fotografía que recolle a presenza de ambos os dous na entrega do Estatuto de Autonomía de 1936 en Madrid.
Alén de ser o alcalde de Santiago de Compostela en 1936, Ánxel Casal tamén foi vicepresidente da Deputación da Coruña, impulsor do Estatuto do 36, membro do Partido Galeguista e integrante das Irmandades da Fala. O BNG de Compostela realizará un acto de homenaxe á figura de Casal, ás 19 horas xunto á súa estatua.
Acto en Teo
Ademais, tamén esta segunda feira, ás 20 horas, terá lugar en Teo (comarca de Compostela), unha homenxe a Ánxel Casal, Pepiño Areosa e todas as personas represaliadas. O acto decorrerá na Estivada da Ribeira, en Cacheiras, e contará coa presenza da alcaldesa, Pilar Lueiro. Previamente, pola mañá, realizarase unha ofrenda floral no mesmo lugar, ás 13 horas.