Descubrir o ser humano: as ramas de Ciencias Sociais e Humanidades

Disciplinas como a Economía, a Historia ou a Socioloxía entrañan un coñecemento profundo da conduta humana. Xa desde o nacemento das primeiras universidades europeas, arredor do século XI, as ciencias sociais e as humanidades constitúen un dos piares fundamentais do saber universal. Actualmente, titulacións como Filosofía, Publicidade, Ciencias Políticas ou Antropoloxía contribúen a que a mocidade galega desenvolva o pensamento crítico e poida comprender os problemas que afectan á sociedade para participar na busca de solucións. No país existe unha grande oferta de estudos no ámbito das Ciencias Sociais e das Humanidades. Anualmente, matricúlanse milleiros de estudantes nos diferentes campus das tres universidades galegas. Durante o curso 2023/2024, a titulación con maior oferta de prazas por preinscrición na rama de Ciencias Sociais e Humanidades foi Administración e Dirección de Empresas: 280 na Universidade de Vigo (entre o Campus Auga e o Campus Tecnolóxico); 200 na Universidade de Santiago e 180 na Universidade da Coruña. Marta Lomba estudou Publicidade e Relacións Públicas en Pontevedra, no Campus Crea da Universidade de Vigo. Despois de rematar o bacharelato artístico na cidade olívica, deuse conta de que lle gustaba o audiovisual. Tras realizar as probas da ABAU, solicitou acceso para Comunicación Audiovisual nas tres universidades galegas, mais non conseguiu praza. "Por sorte ou por desgraza" como di ela, entrou no grao que ocupou o seu tempo durante catro anos. Máis tarde, descubriu que foi unha grande elección. "Ao longo destes anos aprendín moito", recoñece. Agora, un ano despois de rematar a súa formación, traballa en Adegas Valmiñor xestionando os aspectos relacionados coa mercadotecnia e a comunicación da empresa. "Teño moita sorte porque estou traballando no que quero". Na Universidade de Vigo tamén estuda Marcos Otero, concretamente no Campus Auga, na cidade de Ourense. Otero inicialmente escollera Historia, pero cando tivo oportunidade matriculouse na dobre titulación de Turismo e Historia. "Atraíame bastante o turismo e a idea de traballar neste sector", explica. Á hora de facer balance do seu paso pola universidade, Otero salienta as oportunidades que lle ofreceu o programa Erasmus. "Permitiume coñecer estudantes doutros países e a posibilidade de estudar fóra". Neste momento está a piques de rematar o seu quinto curso e xa pon a vista no futuro. "Gustaríame parar un ano antes de comezar un mestrado para pensar ben o que quero facer", afirma. Un país de artistas Carla Lorenzo remata este ano o grao de Relacións Laborais e Recursos Humanos en Vigo. Ela en realidade quería estudar psicoloxía, xa desde pequena interesábase polo estudo da psique. De feito, sempre intentou informarse nese campo a través de artigos científicos. Cando chegou a época da ABAU, viu que o seu obxectivo estaba cada vez máis lonxe e decidiu buscar un "plan B" por se acaso non conseguía alcanzar a súa primeira opción. "Investigando, descubrín a carreira de Recursos Humanos, que se podería entender como a psicoloxía aplicada ao traballo", sintetiza. A un par de semanas de rematar, Lorenzo celebra a súa decisión. "Grazas a estudar este grao, dispoño de moita información que é moi práctica na vida cotiá no ámbito da seguridade social, sindical e laboral". O seu consello para as persoas que estean considerando estudar Relacións Laborais e Recursos Humanos é que se guíen pola súa vocación, "esta carreira é moi recomendábel para as persoas que teñan claro que queren loitar polo benestar dos traballadores". Kiya Barciela é unha das miles de estudantes que cada ano apostan por Ciencias Sociais e Humanidades. Barciela estuda Educación Social na Universidade de Santiago de Compostela. A súa casa está en Tomiño (O Baixo Miño), pero a pesar dos quilómetros que separan a súa localidade de Compostela, para ela a capital galega é o seu segundo fogar. "É unha cidade moi cómoda para vivir como universitaria, hai moitos ambientes que che permiten descubrir o teu lugar". En relación coa súa experiencia na universidade, destaca positivamente que o alumnado poida facer prácticas en terceiro e en cuarto curso. "É unha vía que che permite unha primeira aproximación á realidade laboral". O seu consello para as persoas interesadas nos estudos de Educación Social é que "traballen en descubrir os seus intereses". Brais González soña con ser xornalista deportivo desde que era pequeno. Co corazón e coa mente fixa en alcanzar as súas metas, Brais decidiu hai catro anos apostar pola súa paixón e estudar Xornalismo. "Escollín Xornalismo porque sempre fun un grande afeccionado aos deportes". Con este obxectivo, González trasladouse desde o seu concello, Salvaterra de Miño (O Condado), a Compostela, posto que é a única cidade galega que ofrece esta formación. En termos xerais, González valora de xeito positivo a carreira agás algunhas materias teóricas. Desde a súa perspectiva, o xornalismo debe ser un carreira eminentemente práctica na que a teoría sexa un engadido. Para el o máis importante foi facer novas amizades e ter a oportunidade de tecer unha rede de contactos. "Cursar o grao permíteche coñecer persoas en distintos campos que che poden axudar no futuro", afonda. Lucas Pardo quere ser historiador desde que estudou o Bacharelato. Para cumprir o seu desexo, decidiu estudar Historia en Compostela, nunha das facultades máis emblemáticas de USC con máis dun século de antigüidade. Lucas considera imprescindíbel titulacións como a súa. "Para entender mellor a actualidade, dinme conta de que era necesario comprender o pasado", reflexiona. Nun mes remata o seu segundo curso, pero despois de dous anos confesa que está namorado da capital galega. "Compostela é unha cidade que se axusta moi ben ao que esperaba porque ten unha oferta cultural moi ampla", opina. Lucas tamén forma parte da asociación estudantil Erguer. A súa entrada na organización veu motivada pola súa concienciación cos problemas da sociedade. "Se queres facer cousas para cambiar algo, tes que facelo de modo organizado".