Os talentos a distancia son posíbeis

A presentación oficial da iniciativa fíxose no marco da Fira Mediterrània de Manresa nun showcase só para profesionais o pasado 6 de outubro de 2018. O interese por parte dos programadores foi incríbel, tanto nesa exhibición como na súa posterior presenza no WOMEX 2018, ao que acudiron xa representados pola axencia galega Luneda Producións. Gaizca Project / VV. AA. / Homerecords / 2019 / Once pezas / 12 euros Neste Gaizca Project atopamos a: Ialma –grupo galego de raíces étnicas afincado en Bruxelas, no que sempre primaron as pezas galegas no seu repertorio e conformado polas voces de Verónica Codesal, Natalia Codesal, Eva Fernández e Marisol Palomo. Iñaki Plaza –é un destacado músico vasco, txalapartari e trikitilari. Ademais, toca percusións de raíz. Manu Sabaté –o catalán toca a gralla, para alén doutros instrumentos como o clarinete. De feito, é un dos primeiros en usar a gralla fóra dos límites da música tradicional, na procura de contextos modernos. No disco tamén toca a tarota. Ciscu Cardona –o guitarrista catalán vén de grupos como Folk Riu. Nicolás Scalliet –o baterista belga ten unha ampla traxectoria tocando con grupos de Bélxica. Está claro que neste Gaizca Project non dá tempo a aburrirse. Atopamos diferentes ritmos e ambientes sen cambiar moito as instrumentacións da formación. Combinan ademais pezas instrumentais con pezas cantadas, e trae cancións en galego, catalá, euskera e aranés. Para min, destaca especialmente o traballo lingüístico das Ialma, valente e laborioso, a presenza da trikitixa, cunha pegada espectacular, e o xa mencionado uso da gralla, unha elección instrumental moi curiosa. Sempre me resulta agradábel escoitar novas combinacións tímbricas. Se non, a música sería moi aburrida. "Gañaran as almas podres, propagadoras do medo. Armadas de violencia, de xenreiras e receos. Murcharan as rosas todas, sen froitos os ventres secos. Nas almas das persoa, instalouse o frío inverno".