A remodelación da Xunta de Rueda impacta no Parlamento: cambios en 7 escanos

O primeiro pleno ordinario do Parlamento da Galiza principiou esta terza feira coa toma de posesión do que fora alcalde do Carballiño (comarca homónima) co Partido Popular, Argimiro Martones, como deputado. O carballiñés recolleu a acta que deixou vacante a ex conselleira de Promoción do Emprego e Igualdade Elena Rivo após a súa renuncia.

O que empeza hoxe é o primeiro pleno ordinario que acolle o Pazo do Hórreo na XII Lexislatura e despois de varias sesións protocolarias, como a de constitución da propia Cámara e o pleno solemne que marca o inicio.

Antes de comezar a orde do día púidose ver os deputadose deputadas  dos distintos grupos charlando e felicitando a aqueles que asumen novas responsabilidades.

Un dos que máis contactos recibiu foi o popular José Manuel Balseiro, quen, como primeiro suplente da nova conselleira de Medio Rural no Senado, esta chamado a deixar O Horreo e recoller a súa acta na Camara alta española. A el achegáronse tanto o portavoz parlamentario do PSdeG, José Ramón Gómez Besteiro, como o deputado nacionalista Iago Tabarés, entre outros.

Ademais da posíbel marcha de Balseiro, prevese que haxa outros movementos na bancada popular tendo en conta que a designación de novos cargos do segundo nivel da Xunta forzará novos cambios no Grupo Parlamentario Popular após renunciar á súa acta a ex conselleira de Emprego Elena Rivo. De feito, a circunscrición máis afectada será a de Ourense.

Así, ademais de Rivo, outros catro do oito deputados elixidos polo PP de Ourense o pasado 18 de febreiro deixarán a súa acta para integrarse no segundo escalafón do galego. Quen abandonarán o Parlamento son Gabriel Alén, antes delegado territorial da Xunta na súa provincia e novo director xeral de Comercio; Victoria Núñez, presidenta da xestora do PP local de Ourense, responsábel da Axencia de Protección dá Legalidade Urbanística; Marisol Díaz Mouteira, directora xeral de Patrimonio Natural; e Antonio Rodríguez Miranda, que seguirá á fronte de Emigración.

Os seguintes na lista son Argimiro Marnotes, quen tomou posesión hoxe; José Luís Ferro, Xosé Manuel Merelles, Víctor Manuel Baladrón e Cristina Campero, mais Merelles non chegará a entrar na Cámara porque volverá a Turismo, de maneira que lle tocaría coller acta a Ana Méndez, quen ocupou o posto 14 da candidatura, xusto antes dos suplentes.

Así mesmo, haberá axustes nos grupos de Lugo e Pontevedra. En Lugo, coa saída de Javier Arias para a Delegación da Xunta e de Balseiro para o Senado, entrarían Encarna Amigo e Nicole Grueira (postos 9 e 10 da candidatura do PP de Lugo o 18F).

Á súa vez, por Pontevedra deixará o Parlamento Silvestre José Balseiros para volver á Dirección Xeral de Gandaría. Se non hai alteracións na lista, conseguiría asento no hemiciclo galego José Luís Novo Teijeiro, quen ocupou o posto número 11 por esta circunscrición.

A diferenza das sesións anteriores, nas que a tribuna de invitados estaba repleta de personalidades que acudían para presenciar as citas protocolarias de arranque da lexislatura, esta terza a bancada superior do Hemiciclo estivo case baleira, coa única presenza de dous estudantes de Ciencia Política que seguían con atención a orde do día.