Antonio Maíllo vence á ministra Sira Rego nas primarias de IU e será o líder da formación
O ex coordinador de Izquierda Unida en Andalucía Antonio Maíllo impúxose con claridade á ministra de Mocidade e Infancia, Sira Rego, nas primarias para o liderado da formación, ao obter a súa lista 53,4% dos votos emitidos pola militancia (4.463 sufraxios) para o groso do máximo órgano de dirección da formación.
Rego, que é o principal valor institucional de IU, quedou a unha distancia considerábel de Maíllo ao cultivar a súa candidatura 23,4% dos apoios (1.957), durante unhas votacións decorridas a semana pasada e que a organización difundiu hoxe, nas que participaron 8.350 afiliados e afiliadas —o 52,05% das máis de 16.000 militantes chamadas a depositar o sufraxio—. Por tanto, rexistrouse unha suba de 11,8% nas bases de IU que votaron nas primarias con respecto ao proceso congresual de 2021.
Por detrás fica a lista do coordinador de IU Madrid, Álvaro Aguilera, tras lograr o 14,1% (1.178) dos votos dos militantes, e o representante do sector crítico á dirección saínte José Antonio García Rubio, co 8,3%% (696) do sufraxio emitido. Ambos os aspirantes cuestionaran abertamente a confluencia con Sumar.
Dado que a designación do líder de IU será un proceso indirecto mediante votación o vindeiro domingo da Coordinadora Federal, a organización desprega primarias no marco da súa asemblea federal desta fin de semana para que as bases decidan o peso entre as diferentes listas dos 80 membros iniciais do máximo órgano executivo.
Así, de cara ao domingo, Maíllo conta coa maioría dos integrantes electos para proclamarse líder da formación fronte aos outros sectores, e xa manifestou a súa intención de lograr unha executiva de integación, apelando sobre todo a Rego, quen, á súa vez, púxose ao seu dispor para construír unha organización cohesionada.
Por outra parte, as afiliadas aprobaron o documento político e organizativo presentado pola dirección saínte —na que se referenciaban as listas de Rego e Maíllo— con 62,4% (4.329 votos), mentres que a proposta de relatorio alternativo —impulsada por Aguilera— queda en 25,1% de apoios (1.743), mentres votaron en branco o 12,5% das militantes que participaron.
Relación con Sumar
IU encarou un proceso de confrontación entre os diferentes sectores, repartidos en catro candidaturas, ao fracasar os intentos de acordar unha candidatura de unidade para renovar a súa dirección como se marcou inicialmente a comisión preparatoria da asemblea federal.
Unha asemblea de clarificación, como se denominou por parte de varios candidatos, para determinar non só a cuestión do liderado e a composición da executiva, senón para pronunciarse tamén sobre o papel de IU en Sumar tras as tensións vividas, sobre todo por mor da negociación para a candidatura das europeas. O profundo malestar interno por ter só o cuarto posto da lista ao 9-X levou a suspender a súa presenza nos órganos de dirección do proxecto liderado por Yolanda Díaz.
Precisamente no debate plenario da asemblea esta fin de semana abordarase este asunto no debate do relatorio político e organizativo, dado que hai unha emienda relativa a Sumar. Así, determinarase se se aposta por unha relación de mera coalición ou maior implicación orgánica en Sumar. Esta mañá, Maíllo destacou que IU ten que ser protagonista en frontes amplas á esquerda, non só electorais.