As primeiras testemuñas do xuízo a Baltar "non saben" por que traballaban na Deputación
As catro primeiras testemuñas do xuízo contra José Luís Baltar Pumar, imputado por un presunto delito continuado de prevaricación administrativa, declararon no Xulgado de Instrución nº 1 de Ourense. Juan Luis Cachaldora e Pilar Caride, concelleir@s polo PP en Nogueira de Ramuín e O Carballiño, xunto a Josefa Astray e Rosa María Cabano, tamén militantes do mesmo partido, non souberon explicar perante o xuíz as razóns de estar a traballar para a institucón provincial que presidiu Baltar Pumar entre 1987 e 2012.
Na entrada aos xulgados agardaron unha morea de xornalistas e varios membros do 15-M de Ourense que protestaban contra o que consideran "corrupción e nepostismo". Un dos acompañantes dunha das testemuñas tentou agredir a un cámara e a un fotógrafo da imprensa que cubría a información.
Algunha destas persoas citadas pola investigación dos seus contratos coa institución provincial aínda traballan na mesma
Segundo afirmaron avogad@s da acusación particular á saída do xuízo, ningunha das testemuñas explicou con fundamento por que traballaban na institucion provincial. "Quedou claro que é evidente algo que todo o mundo sabe en Ourense", asegurou o letrado José Arcos, "agora falta aclarar como se produciron esas contratacións". Nas declaracións aseguraban que recibiron chamadas desde a institución, sen aclarar quen as realizaba.
Algunha destas persoas citadas pola investigación dos seus contratos coa institución provincial aínda traballan na mesma polo que o PSdeG, presente como acusación, ten previsto ampliar ao fillo do acusado e actual presidente da Deputación, Xosé Manuel Baltar.
Na Deputación de Ourense traballan máis de 1.200 persoas polo que esta institución ten que adicar en salarios o 40% do seu orzamento. As denuncias presentadas contra José Luís Baltar realizáronse polas sospeitas que presentou que unha grande parte dese funcionariado é militante do PP, mesmo con cargos públicos en activo, ou familiares directos. Nos últimos anos a Deputación de Ourense continuou a convocar oposicións que a acusación particular considera "fraudulentas".