-Estás a apresentar estes días polo país as Bases Democráticas. En que consisten realmente?
-As Bases Democráticas son unha proposta do BNG para superar o actual Estatuto e a actual Constitución e poñer a referencialidade -no momento en que parece que Catalunya o absorbe todo- en que Galiza ten moito que dicer neste debate. Porque se un país necesita o nacionalismo ese país é Galiza, porque somos os que máis padecemos as consecuencias negativas deste estado recentralizado e autoritario. e iso vémolo todos os días en problemas estruturais que non se solucionan e en como o noso país continúa a viver o drama da emigración, salarios máis baixos, un sistema de pensións que nos discrimina e unha deterioración crecente do que son os nosos servizos públicos. E, polo tanto, esta é unha proposta política para situar Galiza no debate que está aberto e, alén do máis, desde a liberdade absoluta de que nós consideramos que o máis útil que podemos facer é defender unha superación do actual marco constitucional e estatutario.
-E que traslación poden ter as Bases ao Parlamento?
-Ben, non vexo Alberto Núñez Feijóo a defender esta proposta porque o seu proxecto é antitético. O que defende é a subordinación e a anulación política de Galiza. Imaxínome que por iso responde con tanta agresividade a propostas que parecen tan lóxicas como que teñamos un marco onde avaliar o que significaron todos estes anos de autonomía e Constitución e ver que propostas ten cada forza política perante o cambio de ciclo evidente que estamos a viver. A súa resposta é o insulto e intentar a criminalización do nacionalismo, mais iso lonxe de ser unha fortaleza mostra a súa debilidade. O que nos revela é que este é un problema para el porque o vai deixar espido perante unha sociedade galega que, máis alá do que poda votar en cada proceso eleitoral, si creo que ten unha vontade nacional e que, sobre todo, non ficaría parada perante un novo agravio a Galiza que, penso, é o que se está a xestar neste momento no Estado.
-Mais por que o PP si aceita abrir unha comisión no Congreso que eventualmente poda alumear unha nova Constitución e, en troca, na Galiza non teñen intención de falar de nada?
-Eu, porén, si creo que nesa comisión que está constituída no Congreso non se vai decidir nada e máis ben foi unha proposta que fixo o PSOE e dá a impresión de que a súa conformación foi o prezo político que pagou o PP para ter ese apoio entusiasta do Partido Socialista á aplicación do 155. Mais estamos a ver que a definición das dinámicas políticas no Estado vai depender máis do que pase nas nacións sen estado, coa forza que está a demostrar Catalunya neste proceso, e non tanto do que poda dar de si unha comisión constitucional no congreso. Desde logo se o noso futuro se vai decidir nesa comisión son pesimista porque daí o único que pode é saír un modelo máis recentralizado, que é o que defenden PP e PSOE, e unha anulación política de Galiza. Polotanto, as Bases Democráticas constitúen unha proposta feita desde aquí e o que plantexa é que pensemos como galegas e galegos que futuro queremos e non termos a actitude de esperar a ver que é o que nos dan desde Madrid. O proceso máis ben ten que ser á inversa.
[A entrevista íntegra, unha dupla páxina, aparece no Sermos272, disponíbel na nosa loxa e nos pontos de venda habituais]