O BNG chama a "non resignarse" e votar pola "alternativa": estas son as medidas que propón para abrir un "novo ciclo"

O BNG chamou esta cuarta feira os galegos e galegas a "non resignarse" ante a "fotografía desalentadora" que deixan os 14 anos de goberno do PP, e subliñou que "hai alternativa" se se toman as decisións adecuadas para cambiar o rumbo o próximo 18 de febreiro. Manifestouno unha das coordinadoras do programa electoral do Bloque, Olalla Rodil, que compareceu ante os medios tras a reunión do Consello Asesor posto en marcha pola formación nacionalista para elaborar o documento político co que concorrerá aos comicios.

Neste órgano, entre outros, participan o que fora conselleiro de Medio Rural durante o Goberno de coalición co PSdeG, Alfredo Suárez Canal; o ex reitor da Universidade de Vigo Salustiano Mato; a profesora de Economía Aplicada da USC María do Carme García Negro; o profesor de Dereito do Traballo e Seguridade Social da UDC Xosé Manuel Carril, e a científica do CSIC Dolores Puga.

Na súa intervención, e tras facer un repaso por algúns datos como os que alertan do descenso da poboación na Galiza, a perda de peso industrial e do aumento das persoas en risco de exclusión, Rodil sostivo que "aínda que esta fotografía é bastante desalentadora" hai unha Galiza que "conta con potencial, con recursos, con capacidade e con talento para cambiar esta situación e para saír adiante".

Neste contexto, subliñou que "hai alternativa a ese devalo económico, demográfico e social" se se toman as decisións adecuadas e necesarias para cambiar o rumbo para partir do 18 de febreiro. "E desde o BNG queremos facer precisamente un chamamento ao conxunto da sociedade galega para non caer na resignación", manifestou, convencida de que esta "non é a única Galiza posíbel".

"Podemos cambiar as cousas, podemos construír un futuro mellor para as galegas e os galegos", afirmou a dirixente do BNG, que apostou por abrir o 18 de febreiro un "novo ciclo histórico" que deixe o "atraso e o conformismo" e que se asente en tres piares fundamentais, como son o impulso de grandes acordos entre os distintos axentes sociais, económicos, culturais e políticos en temas estratéxicos; a ampliación da capacidade política da Galiza, e a reactivación económica e a creación de emprego.

Neste último punto, precisamente, centrouse o denominado Consello Asesor do Cambio Galego, que busca propostas para "sacar adiante e aproveitar todo o potencial" e capacidade do país para pola ao servizo da sociedade galega a través do impulso da transformación tecnolóxica e industrial e o desenvolvemento dos sectores produtivos.

As propostas

Para iso, este Consello Asesor, entre outras cuestións, incide no papel do sector público como elemento tractor e dinamizador da economía e propón un plan de investimentos estratéxicos e transformadoras que mobilice 1.500 millóns de euros no período 2024-2028, así como unha estratexia de compra pública responsábel para apoiar e impulsar o tecido produtivo.

Así mesmo, propuxo un plan de reindustrialización da Galiza que logre situar o peso da industria en arredor de 23% do PIB galego e xerar 12.000 postos de traballo en sectores estratéxicos. En terceiro lugar, pediu o impulso ao medio rural e costeiro do país e a produción de alimentos para garantir e camiñar cara á soberanía alimentaria. Tamén apostou por un pacto galego pola ciencia que sitúe o coñecemento, a investigación e a innovación como panca do desarrallo económico, cultural e social da Galiza, incrementando até 3% do PIB de cara a 2030 o investimento en ciencia e en investigación.

Tamén avogaron pola creación dun consorcio para as infraestruturas e as competencias dixitais participado pola Xunta, pero que tamén teña en conta ás institucións locais e ás universidades para abordar a transformación dixital. Ademais, incidiron na necesidade dun novo modelo enerxético ao servizo do país, que permita que aos galegos aproveitar o potencial eléctrico da Galiza, e, por último, pór no centro das políticas as persoas para garantir condicións de vida e de traballo dignas.

Olalla Rodil destacou que estas son algunhas das conclusións saíntes do traballo desenvolvido por este Consello Asesor ao longo dos últimos meses, co obxectivo de nutrir a proposta de goberno e o programa electoral do BNG. Todo iso, indicou, "co convencemento absoluto de que temos todo por gañar, que os galegos e galegas merecemos moito máis e, sobre todo, que temos dereito a un país mellor", indicou a dirixente nacionalista, que ha incido en que se trata de "propostas ambiciosas, pero realistas", que nacen da "confianza plena e absoluta" no potencial do país.