Causa Galiza abre proceso constituínte para crear unha nova organización independentista, asemblear e socialista
Causa Galiza, que até agora se definiu como iniciativa popular en favor do dereito de autodeterminación, anuncia nun comunicado na súa web que comeza a súa transformación nos vindeiros meses "nunha organización independentista e socialista, de ámbito nacional, asemblear, con vocación de masas e rumada á loita de masas, ideolóxica e institucional". A decisión xorde, afirman, froito do proceso de reflexión desenvolvido nestas semanas, e ten como finalidade "dotar a reivindicación da independencia e o socialismo dun proxecto político amplo, ilusionante e capaz de materializar unha prática efectiva nesta dirección".
"Queremos dotar a reivindicación da independencia e o socialismo dun proxecto político amplo, ilusionante e capaz de materializar unha prática efectiva nesta dirección"
Nesta liña, escollerase en breve unha comisión nacional, con responsábeis permanentes de organización, comunicación e finanzas e enlaces comarcais, encargarase de executar duas tarefas: afortalar a base territorial do proceso e definir os marcos, tempos e liñas mestras, que concluirá coa asemblea nacional constituinte do novo proxecto político para a primavera.
Causa Galiza afirma que "adoptamos esta decisión coa convición de que, neste momento de crise do estado, ascenso da mobilización social e tensionamento das contradicións no país, é aínda máis necesario que nunca articular un proxecto sociopolítico independentista aglutinante e capaz de intervir na realidade nacional e comarcal. Pretendemos contribuir así a dotar de referencia política e edificar un movemento de rutura co España que vaia alén dos exercicios tácticos de simulación, o oportunismo e as alianzas contranatura que hoxe proliferan no campo nacionalista galego".
Chamada a participar con ilusión aos e ás independentistas
Causa Galiza afirma que vai desenvolver un extenso plano de contactos con "decenas de independentistas galegos e galegas interesadas na tarefa proposta e xerar así nas próximas semanas unha onda de ilusión, participación colectiva e compromisos co proceso e os seus obxectivos, abrindo portas e xanelas a todas as persoas que desexen achegar os seus esforzos e impulsar o proxecto independentista".