A coalición Podemos-Alianza Verde reivindícase como a "única opción ecoloxista" nas eleccións galegas
A coalición Podemos-Alianza Verde reivindicouse esta terza feira como a única opción ecoloxista para as eleccións autonómicas que se celebrarán na Galiza o próximo 18 de febreiro. Así o trasladaron nunha rolda de prensa ofrecida hoxe en Santiago de Compostela a candidata da formación morada á Xunta, Isabel Faraldo, e o coordinador de Alianza Verde, Juan López Uralde. Na súa intervención, Faraldo destacou as listas de Podemos como "unha candidatura de xente común que traballa para xente común" e a única con "clara perspectiva ecoloxista" nun contexto ademais de alza da preocupación polo medio ambiente ante a vertedura dos pellets.
Pola súa parte, Uralde asegurou que "non hai ningún territorio que estea alleo á actual e grave crise ambiental", que "afecta todas e cada unha das actividades" nas que se ve involucrada xente traballadora. Por iso, destacou que a achega de Alianza Verde a esta candidatura é a "perspectiva ecolóxica". "Pero un ecoloxismo comprometido cun cambio real", dixo Uralde, que asegurou que un dos problemas cos que se atopan é que "parece que todo o mundo pon a camiseta verde" pero, á hora da verdade, "non se fan políticas que vaian no sentido de romper co actual ciclo de destrución" no que se está inmerso.
Vertedura de pellets
Neste punto, citou a vertedura dos pellets que afecta a costa galega para considerar que a manifestación rexistrada este domingo contra a xestión da crise por parte da Xunta da Galiza permitiu pór de manifesto que a sociedade galega "está comprometida" co medio ambiente. Para o coordinador de Alianza Verde, esta vertedura "non é máis que a punta do iceberg" dun problema "gravísimo" como é o da contaminación dos mares, que tivo nesta vertedura "unha nova expresión".
Sobre este asunto, chamou a atención sobre o feito de que este tipo de produto estea a transportarse polo mar "en condicións absolutamente inadecuadas". Por iso, lembrou que Podemos presentou a semana pasada unha iniciativa no Congreso para exixir que o transporte deste tipo de sustancias se realice como "mercadoría perigosa" e evitar que estas verteduras acaben afectando a cadea trófica. Ademais, incidiu en que tamén se trata da "punta do iceberg" dun problema como a "contaminación por plásticos" no mar, do que os pellets son "só unha parte".
"Entendemos que é imprescindíbel que se tomen medidas para a defensa dos mares contra a contaminación, para a defensa das rías, e ese vai ser un dos nosos compromisos na campaña, porque a defensa do medio mariño é un elemento imprescindíbel", dixo, tanto para o medio ambiente como para o mantemento de actividades económicas como a pesca e o marisqueo.
Por último, citou como outro dos eixos da candidatura a defensa do territorio fronte a proxectos que "ameazan o medio ambiente" como poden ser "distintos proxectos mineiros". Neste punto, avogou tamén pola "necesaria ordenación" do territorio para os proxectos enerxéticos que se expoñan. "Un desenvolvemento que cremos necesario, pero que debe facerse adecuadamente e respectando o territorio", afirmou.
Belarra e Montero
Na rolda de prensa, e preguntada pola presenza dos dirixentes estatais de Podemos na Galiza durante a campaña, Faraldo explicou que visitarán o país tanto Ione Belarra como Irene Montero, pero incidiu en que se trata de "unha candidatura" cuxa importancia está na "xente común da Galiza" que a conforma.
Ademais, Uralde, que iniciou a súa intervención chamado a atención sobre as incidencias que se rexistran no transporte ferroviario que conecta á Galiza co resto do Estado, considerou necesario a posta en marcha dunha rede de ferrocarril "en condicións". "É un tema que imos denunciar, porque unha das nosas apostas é transporte sustentable e iso pasa por ter unha rede en condicións que aquí non temos", argumentou.