'Defende A Galega', cinco anos de mobilización contra a censura e a manipulación

Hoxe decorre un novo 'Venres Negro', o número 264. Persoal da radio e televisión pública galega volverán vestir de negro para reivindicar o que demandaban xa naquela primeira sexta feira de mobilizacións, o 25 de maio de 2018: a fin da manipulación nos medios públicos galegos. E, tamén, "que se cumpra a lei", como apunta a Nós Diario o colectivo Defende A Galega, impulsor destas mobilizacións, en referencia á Lei de medios, aprobada en 2011 e cos seus aspectos máis determinantes sen implementar: nin estatuto profesional, nin Consello de Informativos nin un director xeral elixido por maioría reforzada no Parlamento galego. O actual, Alfonso Sánchez Izquierdo, leva 14 anos no cargo. As demandas e denuncias de persoal da CRTVG non mudaron nestes anos, mais o contexto si. "Incrementouse a represión contra o persoal con fórmulas cada vez máis orixinais e desastrosas para os medios públicos, como é o caso dos traslados forzosos de traballadoras", indica o colectivo Defende A Galega. Persoal da CRTVG recibe Sánchez Izquierdo ao berro de "dimisión" á súa chegada ao Parlamento Un extremo que tamén confirman os sindicatos. Tiago Alvite, da CIG, fala directamente de "abusos" por parte da dirección da CRTVG: "Trato degradante, marxinación laboral, traslados forzosos de posto" para aquelas traballadoras e traballadores que son "críticos" coa dirección do ente. Unha realidade, engade, que está recollida en diversas resolucións xudiciais ao longo destes anos: "Hai sentenzas por vulneración de dereito á folga, por incumprir a igualdade de xénero, a conciliación...". Demandas en marcha En marcha hai varias demandas contra a Corporación por persoas que advirten que foron "desprazadas" das súas funcións habituais. Defende a Galega, ademais, afirma que a situación que se vive na CRTVG "pasa factura" entre o colectivo de traballadoras e traballadores. "Non hai máis que facer reconto da cantidade de persoal que tivo que coller baixas por ansiedade ou que tivo que medicarse", sinala. A lista de profesionais que dunha ou doutra maneira estiveron "baixo o dedo" da dirección por seren "críticos" non é pequena, apunta un traballador da compañía: desde Tati Moyano e Alfonso Hermida —presentadores do Telexornal que dimitiran en 2018 por "discrepancias" coa liña informativa"— a Marga Pazos, Carlos Jiménez, Mayte Cabezas ou Ana Pérez. Carlos Jiménez, expedientado pola CRTVG: "A sentenza do TSXG demostra que non debemos axeonllarnos ante o que é unha inxustiza" Raquel Lema, da CUT na CRTVG, ve nesa "escalada da represión" laboral a resposta da Dirección ao incremento nestes anos da "organización da dignidade, da organización das traballadoras e traballadores contra a manipulación" nestes medios. Cinco xornadas de folga Até cinco xornadas de folga tiveron lugar na CRTVG nestes meses para denunciar e protestar contra ese "clima laboral". Convocatoria do Comité Intercentros que este cualifica de "éxito" e de demostración de que a maior parte do cadro de persoal da CRTVG está "farta". Opinión moi distinta é a da propia compañía. A preguntas de Nós Diario sobre a valoración da CRTVG a respecto das denuncias e das protestas, o departamento de comunicación reduce a incidencia de Defende A Galega entre o persoal da compañía. "Son 50" Neste sentido, afirman que "o movemento ao que fai referencia substánciase nun máximo de 50 persoas a día de hoxe. Iso significa que aproximadamente o 95% do plantel de traballadores da CRTVG non se identifican con estas protestas". 200 venres negros na CRTVG denunciando a manipulación informativa e a censura Apuntan, ademais, que "é un feito que este movemento na TVG é simétrico aos Venres Negros de TVE, que desapareceron en canto houbo unha mudanza no Goberno [estatal] na que os líderes dos Venres Negros pasaron a asumir cargos de responsabilidade na nova estrutura". Defende A Galega, porén, mantén que o cadro de persoal dos medios públicos galegos entende e apoia as loitas desenvolvidas ao longo deste tempo. "Pode verse no seguimento masivo da folga que convocou o Comité de Empresa contra a represión da dirección ao persoal que non vai polo rego", reafirman. Desde o inicio A loita contra a manipulación e polo dereito a unha información veraz nos medios públicos galegos non naceu hai cinco anos, se ben é nesta última etapa cando alcanza unha organización, incidencia e visibilidade máis alta. "Desde o inicio houbo moitos traballadores e traballadoras implicados neste compromiso", afirma Tiago Alvite. O responsábel da central nacionalista na CRTVG vai debullando diversos momentos ao longo da historia da radio e da televisión galegas nos que o persoal se moveu e actuou contra a "manipulación": da cobertura informativa das vacas tolas ás vagas de incendios que cada verán arrasan miles de hectáreas nos montes galegos. Mais foi coa catástrofe do Prestige en 2002 cando esta visibilidade do malestar dos profesionais coa cobertura deste tema que quería facer a dirección da casa tivo unha especial visibilidade coas denuncias do Comité Interempresas que, naquela altura, presidía a xornalista e escritora Begoña Caamaño e que chegou a solicitar o amparo do Valedor do Pobo. Tres anos en defensa dos medios públicos "Máis que xestores dun servizo público convertéronse nunha correa de transmisión dos intereses políticos do PP", denunciaba daquela Begoña Caamaño. A mesma denuncia que, máis de dúas décadas despois, manteñen profesionais da radio e televisión pública galega. "Botamos de menos a implicación de entes como a RAG ou universidades" Unha das mobilizacións de persoal da CRTVG decorrida nestas semanas. (Foto: Nós Diario) Defende A Galega agradece e valora o "apoio social" que recibiu ao longo destes anos. Mais, apunta, ese foi un apoio da cidadanía, "individual". "Botamos de menos a implicación de institucións como o Consello da Cultura Galega, a Real Academia Galega, as universidades... Eses organismos deben alzar a voz na defensa duns medios públicos dos que depende a calidade democrática e a promoción da identidade propia", sinalan a Nós Diario. O colectivo amplía as súas reivindicacións e demandas máis aló da fin da censura ou manipulación. "Pedimos tamén un compromiso coa produción propia, que se usen os recursos humanos e materiais que teñen a radio e a tele en vez de encargar contidos fóra. Que se ofreza información local, é un dereito dos cidadáns, damos máis información do que pasa na Comunidade de Madrid que das comarcas galegas, salvo cando hai un suceso. Que se potencie a información cultural, que se deseñe unha programación infantil... En definitiva, que se cumpra co servizo público que nos foi encargado". Lamentan a actitude da Dirección da CRTVG a respecto das demandas. "Non houbo ningunha resposta nin por parte da Dirección Xeral, que se limitou a dicir que o está facendo fenomenal nin por parte do parte do PP, que ten a maioría absoluta no Parlamento e a chave para facer os cambios que esixe a lei". Para Tiago Alvite, a actual Dirección "actúa por imposición, sen transparencia e para servir aos intereses do PP". Na mesma liña, Raquel Lema considera que a actual ponte de mando da CRTVG "é a que menos dialoga de toda a historia dos medios públicos galegos".