O concelleiro do PP en Noia Luis Alamancos, coñecido polas súas colaboracións co famoso programa de televisión Cuarto Milenio, rompeu esta quinta feira a disciplina de voto do seu grupo e tombou, xunto cos votos das formacións da oposición (PSOE, BNG e Marea Cidadá), a aprobación definitiva dos orzamentos da localidade noiesa.
O voto en contra de Luis Alamancos, até o de agora concelleiro responsábel das áreas de Seguridade Cidadá e Persoal do Concello, non só tombou as contras, senón que pon o Executivo liderado de PP e Noieses Independentes Agrupados en minoría.
Tras unha decisión que foi cualificada de “sorprendente” polo alcalde da localidade, Santiago Freire, Alamancos renunciou ás súas competencias e deixou o grupo municipal do PP. Así, ao rematar o pleno, solicitou pasar ao grupo de concelleiras e concelleiros non adscritos, que estará integrado só por el.
