O home de Iglesias en Madrid obtén unha plusvalía de 30 mil euros cunha vivenda protexida
En 2010 Ramón Espinar, portavoz de Podemos no Senado, mercou unha vivenda protexida por 146.224 euros. Un ano despois, e sen tela ocupado, vendeuna por 176.000. Obtivo unha plusvalía de 30 mil euros.
Esta operación inmobiliaria -desvelada pola SER, non ten problemas de legalidade, mais si tal vez confronta cos estándares éticos de Podemos. En realidade, Espinar solicitou vender a morada ás poucas semanas de a ter mercado. Se renunciase a ela, podería ter permitido que calquer solicitante de vivenda protexida accedese á morada a un prezo por debaixo do mercado. Non o fixo e grazas a iso embolsou unha plusvalía de 30 mil euros.
Espinar mercou a casa cunha entrada de 52.000 euros e unha hipoteca de 90 mil. Nese momento era estudante universitario e non tiña ingresos. O político de Podemos declinou precisar como obtivo o diñeiro que lle permitiu financiar a casa. O que é evidente é que nunca tivo interese en ocupar a vivenda, pois, ás poucas semanas de a mercar, solicitou á comunidade autónoma de Madrid permiso para a vender.
Resta agora por ver que influencia pode ter este asunto na campaña interna que enfrenta Espinar, representante de Pablo Iglesias, na loita co sector errejonista polo control da organización madrileña.