López Rico alerta que Anova pode ''acabar de Izquierda Federal del Noroeste''

 

Mario López Rico é 'beirista' desde hai décadas. Definición que abrangue sintonía política e amizade persoal. Este sábado o ex-integrante da Permanente de Anova (da que demitiu con 9 compañeiros tras gañar no referendo a opción de ir con IU ás europeas) opina nunha entrevista en La Voz de Galicia sobre a situación de Anova-Irmandade Nacionalista.

López Rico fai súa a preocupación que existe en certo sector da formación de que Anova acabe “fagocitada” por IU. “Beiras cometeu un erro (en referencia a se decantar por ir con IU ás europeas) e o problema de Anova é que acabe sendo la izquierda federal del noroeste. A maioría de Anova non está por iso”. Na entrevista, mesmo apunta que a opción escollida na consulta “deixa moi tocado ao proxecto orixinario” da Irmandade Nacionalista. Iso si, adianta que “perder unha batalla non é perder a guerra” e que queren “rexenerar o proxecto orixinario”.

''Creo que a Martiño (Noriega) non lle contaron ben o conto dos cabritiños. Segue pensando que cando o lobo mete a pata enfariñada por debaixo da porta é da nai cabra, cando é do PCE''

A candidatura ás europeas non é, sostén Mario López Rico, un pacto entre iguais, senón “que se di ti vas aquí”. Mais o que el considera preocupante é que se estea nun escenario no que “Anova se pode xogar a súa existencia”. Como xa dixera Luis Eyré, 'Palleiro', tamén dimisionario da Permanente, nunha entrevista en Voz TV, a escolla de ir en IU á cita as europeas non é a 'Fronte Ampla' que, sosteñen, está no cerne programático de Anova. López afirma, neste punto, que “o BNG e IU son os responsables de que non saíra adiante a fronte ampla. O BNG tivo unha actitude sectaria, non quixo sentarse con IU, cos españolistas. Pero IU tampouco lle deu autonomía a EU. E IU non lle deixou a EU demostrar que era unha forza galega e poder chegar a acordos previos en Galiza".

“IU non lle deixou a EU demostrar que era unha forza galega e poder chegar a acordos previos en Galiza”

Na entrevista tamén critica á FPG (“As comparacións que se fan ao respecto do que facía a UPG no BNG pois tamén o pretenden aquí") e rexeita a “predenominación” de Lidia Senra para ocupar o posto de Anova na candidatura de IU pois, entende, a persoa que se designe ten que ser eleita pola militancia.