Pontón comprométese en Tomiño a impulsar os proxectos estratéxicos para a comarca como a autovía ou o parque industrial
A candidata á Presidencia da Xunta, Ana Pontón, proseguiu hoxe a súa campaña electoral nun mitin en Tomiño, onde aproveitou a súa intervención para destacar algunhas das medidas para este concello e o conxunto da comarca que ten previsto desenvolver o Goberno que aspira a presidir.
Pontón avanzou que, se os galegos e as galegas lle dan a súa confianza o próximo 18 de febreiro, Tomiño e o resto dos concellos da comarca van ter un aliado no seu executivo porque "precisan un goberno que reme a favor e non en contra, comprometido co benestar social e que aposte por mellorar os servizos públicos", a empezar pola sanidade e a Atención Primaria.
A candidata nacionalista tamén subliñou o seu firme compromiso co desenvolvemento económico do Baixo Miño, "porque é a maneira de que medre con máis riqueza e máis emprego", subliñou, e, fronte a un goberno do PP que paraliza proxectos estratéxicos, para a comarca, avanzou que será un goberno do BNG o que os impulse.
Neste sentido, avanzou a súa aposta por proxectos estruturais fundamentais como a autovía, ou o parque empresarial de Tomiño, así como a ampliación do IES Alonso Ríos porque, segundo recalcou, "hai que aumentar os equipamentos educativos".
Pontón tampouco quixo esquecer a posición estratéxica do Baixo Miño na fronteira con Portugal, polo que considerou prioritario fortalecer as relacións co país veciño como un dos eixos de desenvolvemento socieconómico da comarca e do conxunto do país.
"Aproveitar a oportunidade da integración económica con Portugal apostando por infraestruturas que vertebren esa relación, como a liña de ferrocarril Vigo-Porto, ou traballando pola cooperación transfronteiriza e a eliminación de barreiras administrativas", afondou.
Na súa intervención, a líder do BNG apelou á xente que apostou por un Tomiño mellor para volver "facer historia" no conxunto do país. "Iso é exactamente o que quero facer o 18 de febreiro", indicou, "construír con todos e todas vós unha Galiza mellor, con futuro e en grande", fronte á Galiza "gris e en pequeno que deixa o PP logo de 15 anos de goberno".
Pontón mstrouse convencida de que se os galegos e as galegas que queren cambio se mobilizan masivamente o día 18 e acoden ás urnas coa papeleta do BNG na man, o País fará historia dando paso "ao mellor goberno de todos os tempos liderado por unha presidenta coas mans libres para defender os intereses deste País".
"É o momento de apostalo todo ao BNG", proclamou para apelar directamente á xente que peor o está pasando e a aqueles que están "angustiados" pola precariedade laboral, pola "desorbitada" suba de prezos ou porque ven como os salarios non dan máis de si e cada día lles custa máis chegar a fin de mes.
"A todas esas persoas quero dicirlles que o 18 de febreiro podemos deixar atrás esta Galiza que vai a menos, e poñer en marcha unha Galiza con futuro", asegurou, remarcando as dúas claves que son necesarias para o cambio: "unha mobilización masiva nas urnas, que ningún voto se perda, e concentrar todo ese voto de cambio no BNG".
"Imos estar á altura da súa confianza traballando día a día por mellorar as súa vidas", destacou a candidata, que comprometeu un goberno que porá ás persoas no centro das súa políticas construíndo unha Galiza con máis oportunidades e pasando páxina a quince anos do nefasto legado que deixa o PP.
"Eu ben sei quen son e a quen me debo, a min ninguén me dará ordes máis que os galegos e as galegas", afirmou no mitin que protagonizou xunto ao cabeza de lista por Pontevedra, Luís Bará, en Tomiño, onde insistiu en que ante a cita do 18 de febreiro só hai dúas alternativas: "seguir ancorados no pasado co PP e o candidato Rueda ou mirar con ilusión cara ao futuro cunha presidenta que só se debe á xente".
"Hai momentos en que a historia pode tocarse coas mans", proseguiu Pontón, que se presentou como a candidata desa maioría social que quere cambio e un futuro mellor, á que se dirixiu para dicirlle que non importa que papeleta colleron noutras eleccións porque hai moitas formas de sentirse galego ou galega e todas son necesarias para construír unha Galiza en grande.
A toda esa cidadanía comprometeu, por último, un goberno que recupere a sanidade pública para que a saúde non dependa da tarxeta bancaria; que coloque a enerxía ao servizo das familias e das empresas; que poña en marcha todo o potencial do País para que a xente moza non teña que facer as maletas.
Mobilización de terras na comarca
Pola súa parte, Luís Bará, cabeza de lista por Pontevedra, afirmou que o BNG "vai co turbo posto" cara o 18 de febreiro para "impulsar non só un cambio de goberno, senón un cambio de época ilusionante, transformador, e que está a mobilizar a esperanza e ilusión de moita xente da man de Ana Pontón".
Nesta liña, e fronte a un Rueda "gris" á fronte dun goberno do PP apático, indicou que o Bloque ten propostas e alternativas de goberno baseadas en dúas ideas: mellorar a vida da xente e poñer o país a producir porque, segundo recalcou, "queremos xerar riqueza no monte, no mar, no agro e na industria".
Bará avanzou que un executivo liderado polo Bloque mobilizará terras para potenciar a economía do Baixo Miño, "un verxel" que produce e exporta plantas, flores e froitos grazas ás súas características e que ten moita marxe de crecemento e coincidiu con Pontón na necesidade de apoiar a creación de solo industrial.
Pola súa banda, a candidata da comarca Carme Núñez fixo referencia ao seu labor como médico e exemplificou no centro de saúde de Tomiño o deterioro da sanidade pública do País logo de 15 anos de goberno do PP. Núñez explicou que habitualmente hai dous ou tres profesionais para unha poboación de case 14.000 habitantes e que o consultorio de Goián só foi aberto un mes antes das eleccións, pero sen solucionar o problema de fondo que é a falta de persoal. "Agora abre tres días á semana, ás veces só con enfermeira, unhas veces vai un médico, outras veces hai outro. Un desastre. Non solucionan o problema do ambulatorio de Goián porque non son capaces", reprochou.
A candidata nacionalista confrontou os recortes do PP co reforzo da sanidade pública que vai desenvolver un goberno liderado polo BNG, poñendo en marcha un plan de rescate da Atención Primaria dotado con 200 millóns, o que permitirá incrementar o número de profesionais en todas as categorías, ambulancia medicalizada, entre outros territorios, para o Baixo Miño, e garantir a asistencia pediátrica para todas as crianzas, independentemente de onde vivan.
Encontro con representantes do sector da cultura
Previamente, Pontón mantivo un encontro co escritor Carlos Callón, a escritora Berta Dávila, o actor Monti Castiñeiras e o músico Mondra, unha cita que a candidata nacionalista aproveitou para reivindicar o galego como "a lingua que nos une e unha riqueza extraordinaria que nos permite desenvolver a cultura propia" e, ao mesmo tempo, "colócanos no mundo cunha ollada persoal e singular". "Se podemos falar dunha cultura galega é porque temos un idioma noso que nos permite falar de ti a ti co resto de culturas do planeta", afirmou.
"O galego non fronteiras nin ten límites", continuou, como se comproba hoxe con dúas películas en galego competindo polos Goya, coa Cuncha de Ouro do Festival de Donosti, o co "pelotazo musical" das Tanxugueiras e dos novos talentos musicais que enchen escenarios, como Fillas de Casandra ou o propio Mondra, exemplificou. Tamén, agregou, coa nosa literatura triunfando ao máis alto nivel en narrativa, en poesía ou teatro.
Pontón subliñou que nun mundo globalizado ter unha lingua propia é "unha enorme oportunidade", un valor engadido para nós e para achegar aos demais pobos e culturas do mundo. Porque o galego, engadiu, "universalízanos e colócanos no mundo con personalidade propia".
Destacou, neste sentido, que a cultura é un dereito que, ademais, xera riqueza, dinamismo económico e emprego, e de aí que un goberno do BNG porá en marcha un modelo cultura integral, apoiando o tecido empresarial galego e con financiamento público suficiente, explicou. "A cultura galega vai ter en min unha aliada porque quero ser a presidenta dun goberno que aposte pola nosa lingua e a nosa cultura en todos os eidos creativos", garantiu.
Durante o encontro, Pontón propuxo como obxectivo do seu goberno destinar o 2 % do orzamento a investir en cultura, o que serían arredor de 300 millóns de euros anuais, triplicando os fondos que destina o goberno do PP, "que leva quince anos limitando o potencial da nosa lingua, da nosa cultura e dos nosos creadores e creadoras", criticou.
Co BNG no goberno vaise impulsar tamén unha Lei galega de dereitos culturais, porque "queremos unha sociedade formada, participativa e crítica", dixo a candidata nacionalista durante a conversa, na que apostou por fomentar o mecenado cultural con incentivos fiscais. Avanzou tamén que co BNG na Xunta haberá unha liña de crédito específica para proxectos culturais.
Pontón comprometeuse, por outra banda, a prestar atención prioritaria á situación socio laboral dos traballadores e traballadoras da cultura, e a crear bolsas e residencias literarias e artísticas par apoiar a creación de novos valores, tal e como se recolle no programa de goberno do Bloque.
Os medios públicos serán clave, proseguiu, para favorecer a difusión e a cultura galega, e para iso unha das medidas anunciadas pola candidata á Presidencia será destinar o 6 % do orzamento anual de RTVG a impulsar a creación audiovisual galega e en galego, especialmente o cinema.