Pontón di que só o voto ao BNG dá "peso político" a Galiza no Estado

Soutomaior, concello na comarca de Vigo que estrea alcalde nacionalista após as municipais do 28-M, acolleu o mitin central na xornada de onte do BNG para as eleccións do 23-X. Un acto no que a portavoz nacional do BNG, Ana Pontón, reiterou o chamamento a unificar na papeleta da formación nacionalista todo o voto "na defensa do noso país". A formación nacionalista encara o 23-X coa máxima ambición, incidiu Pontón, !para dar peso político a Galiza en Madrid".

"Somos a única forza coas mans libres para facer valer as causas da Galiza, desde un tren do século XXI a unha tarifa eléctrica galega, desde o corredor atlántico a políticas que creen industria, desde investimentos xustos á creación de máis xulgados de violencia de xénero", asegurou no mitin que compartiu coa cabeza de lista por Pontevedra, Carme da Silva, e o alcalde nacionalista de Soutomaior Manu Lourenzo.

"Non é o momento de votar polo mal menor, ni de votar por medo. Ao contrario. Pídolle a todos os galegos e ás galegas que o vindeiro día 23 de xullo voten con ilusión, con esperanza, que voten por un grupo galego forte para facer respectar Galiza en Madrid sabendo que o BNG non lles vai fallar", concluíu Pontón.

Derrogación

Durante a mañá, Pontón mantivo un encontro cos representantes sindicais do sector do metal en Vigo,  desde onde avanzou que o BNG impulsará no Congreso a derrogación íntegra da reforma laboral aprobada polo PP en 2012, "utilizando a forzas dos votos que os galegos e as galegas nos dean na cita coas urnas o 23 de xullo".

"O BNG acertou cando advertiu que a reforma laboral aprobada polo actual goberno consolidaba o groso da reforma laboral do PP, tal é así que até o propio candidato do PP español Alberto Núñez Feixoo anunciou que non a ía cambiar porque lle parece unha boa reforma, proba de que os aspectos máis lesivos seguen vixentes", alegou a líder nacionalista.