Pontón nega a posibilidade dunha moción de censura en Muxía: "O BNG non lle dá Alcaldías ao PP"

A portavoz nacional do BNG, Ana Pontón, negou a posibilidade de que existan contactos co PP para unha moción de censura no municipio de Muxía (comarca de Fisterra) que arrebate o bastón de mando ao socialista Iago Toba, como o propio alcalde denunciou a pasada semana nun pleno.

"O BNG non lle dá Alcaldías ao PP", sentenciou Pontón a preguntas dos medios esta segunda feira en Compostela sobre as declaracións do rexedor muxián, que asegurou durante a última sesión plenaria que había unha "manobra escura" para apartalo da Alcaldía por parte do PP e do BNG, extremo que as agrupacións locais negan.

Besteiro non falou con Toba

Tamén se pronunciou respecto diso o secretario xeral do PSdeG, José Ramón Gómez Besteiro, que recoñeceu que non tivo oportunidade de falar con Toba sobre a situación no Concello e esa suposta moción de censura que "non está materializada nestes momentos".

En todo caso, mostrou o seu respaldo ao rexedor de Muxía e cre que "non hai razóns" para unha hipotética "alternativa" ao Goberno do PSdeG que vería "incoherente".