Fotografía de grupo e primeiras declaracións aos meios. Ese foi o roteiro da primeira toma de contacto dos 14 parlamentares (5 por A Coruña, 4 por Pontevedra, 2 por Lugo, 2 por Ourense) obtidos por En Marea o 25S.
“A cidadanía falou e levou até o Parlamento de Galicia (sic) un grupo de 14 deputados e deputadas que levarán unha mensaxe de dignidade, a nosa primeira función alí”, declarou Luís Villares, a figura que encabezou as candidaturas e que xa oficia como portavoz do grupo.
Facer do traballo institucional terminal da interlocución coa cidadanía, esa é a aposta de En Marea. “O traballo institucional será o resultado do traballo na rúa”, declarou Villares. E engadiu: “Seguiremos a falar ao longo e ancho do país durante estes catro anos e polo tanto o noso traballo parlamentario será a resultante de aplicar o noso programa e de escoitar á cidadanía“.
Interpelado a respeito da distribución de responsabilidades dentro do grupo parlamentar, Villares esclareceu que “se fará tendo en conta os puntos fortes de cada un dos deputados de En Marea“.
