Xunta non usa 34 millóns de euros da UE para emprego xuvenil embora o paro na mocidade estar en 37%
Apenas gastou 5 dos 39 millóns recibidos dos fondos europeos. Galiza case duplica a media europea de paro xuvenil.
A Xunta apenas empregou os perto de 40 millóns de euros de fondos europeos destinados a impulsar o emprego xuvenil embora que no noso país o paro entre os menores de 25 anos case duplica a media da Unión Europea. Así o denunciaron desde as fileiras socialistas, que criticaron que dos 39 millóns que chegaron da UE para emprego xuvenil entre 2014 e este 2017 a Xunta só investiu 5 millóns, malia que sufrimos unha alta porcentaxe de desemprego na mocidade.
De feito, e segundo os dados da Enquisa de poboación activa (EPA) do cuarto trimestre de 2016 a taxa de paro entre os mozos galegos de menos de 25 anos é de perto do 37 (25.000 mozos e mozas). Descendeu a respecto do segundo semestre, cando era de 42%, mais mantense nuns niveis moi altos. En 2010, un dos anos máis golpeados polo desemprego, esa taxa de paro entre os menos de 25 anos estaba en 34,7%.
Mais cando se comproba a fenda existente é se a comparamos con Europa. O noso case 37% de desemprego xuvenil doe nos ollos de o compararmos coa porcentaxe de 20,4% que é a media na Unión Europea. Case duplicamos esa porcentaxe.
Aliás, o soldo medio dunha persoa moza en Galiza é un 9,4% inferior á media da xuventude española. E un 17,9% inferiores á media anual das outras franxas de traballadores de Galiza. A isto engádese que os mozos galegos sofren taxas de temporalidade alarmantes, de 46,84 por cento, fronte 25,8 por cento que se rexistra no conxunto de idades.