As imperdíbeis de París 2024: 26 deportistas e eventos a seguir na cita olímpica deste verán

LÉON MARCHAND, NATACIÓN (M) FRANCIA, 2002. 200m e 400m ESTILOS, 200m BOLBORETA E 200m BRAZA. O quíntuple campión mundial nas probas de estilos e 200 bolboreta pode ser o heroe francés nos Xogos do seu país. Leva dous anos adestrándose nos Estados Unidos cun adestrador inigualábel, Bob Bowman, a man dereita do 23 veces campión olímpico Michael Phelps. SIMONE BILES, XIMNASIA ARTÍSTICA (F) ESTADOS UNIDOS, 1997. A ximnasta máis laureada da historia intentará resarcirse da súa última participación nos Xogos. Toquio 2020 non foi unha competición sinxela para ela e viuse obrigada a abandonar, mais agora terá unha nova oportunidade de sumar varias preseas ás sete que xa ten —catro delas de ouro—. ELIUD KIPCHOGE, ATLETISMO (M) KENYA, 1984. MARATÓN. Con catro preseas olímpicas, dúas delas nesta modalidade, o kenyano intentará facer o imposíbel: ser o primeiro maratoniano con tres ouros olímpicos. Ademais, conta coa segunda mellor marca da historia na distancia. Poderá conseguilo? SELECCIÓN ESPAÑOLA, FÚTBOL (F) A Selección española está imparábel. O pasado ano proclamouse campioa do mundo e a comezos de 2024 logrou o segundo título consecutivo, a Liga das Nacións da UEFA, coroándose como a nova sensación do fútbol mundial. En París terán a súa primeira participación nuns Xogos, e con elas estará a galega Tere Abelleira. Voltarán a ser de ouro? París 2024, oportunidade histórica para Galiza: o perfil das 26 atletas olímpicas ARMAND DUPLANTIS, ATLETISMO (M) SUECIA, 1999. PÉRTEGA. É a perla dos Xogos de París. Leva desde os tres anos practicando pértega e aos 7 xa era o mellor do mundo na súa categoría. Conta coas sete mellores marcas da historia e un ouro olímpico en Toquio 2020. Salvo fallo, voltará a subir ao máis alto. SELECCIÓN ESTADOUNIDENSE, BALONCESTO (F) Breanna Stewart é o faro da selección estadounidense, que chega a uns novos Xogos cun equipo incríbel. No seu palmarés destacan dous ouros olímpicos, outros dous no Mundial, dous títulos da WNBA e dous MVP das finais. Unha auténtica gañadora nun equipo que conseguiu todos os ouros olímpicos desde Atlanta 1996. SAÚL CRAVIOTTO, PIRAGÜISMO (M) CATALUNYA, 1984. Tratará de converterse no primeiro deportista de todo o Estado español en gañar seis medallas olímpicas. Intentarao liderando o seu equipo en piragüismo sprint. Despois de ser abandeirado en Toquio, unha presea en París fecharía o seu perfecto palmarés. KATIE LEDECKY, NATACIÓN (F) ESTADOS UNIDOS, 1997. 400m, 800m, 1.500m e 4x200m LIBRE. En 2012 logrou ser campioa olímpica con só 15 anos. A partir dese momento converteuse na mellor nadadora de medio fondo e fondo do mundo. Ten un total de 10 medallas olímpicas e pensa continuar no máximo nivel até Os Ánxeles 2028. Os grandes fitos da historia da Galiza nos Xogos Olímpicos SELECCIÓN ESTADOUNIDENSE, BALONCESTO (M) A estrela da NBA LeBron James participará nos que poden ser os seus últimos Xogos Olímpicos. Ten dous ouros e un bronce na competición, é o máximo anotador da historia da NBA e catro veces gañador do anel da liga estadounidense. París pode ser o broche perfecto para a súa carreira. SHA'CARRI RICHARDSON, ATLETISMO (F) ESTADOS UNIDOS, 2000. 100m, 200m e 4x100m. Nas probas de velocidade feminina será a principal protagonista. Nos mundiais de 2023 logrou presea nas súas tres probas fetiche con dous ouros en 100 e 4x100 m e unha prata nos 200 m. Logrará a súa primeira medalla olímpica? MATHIEU VAN DER POEL, CICLISMO (M) BÉLXICA, 1995. CARREIRA EN RUTA. Malia que nun primeiro momento se propuxo loitar polos metais en dúas disciplinas diferentes, ruta e montaña, finalmente renunciou a esta última para centrarse na 'proba raíña' e competir tamén no Tour de Francia. Chega a París como o actual campión mundial de ciclismo en ruta. IDALYS ORTIZ, JUDO (F) COLOMBIA, 1989. +78kg. Ten catro Xogos Olímpicos as súas costas e en todos eles conseguiu unha presea olímpica. En París loitará, nunca mellor dito, por manter a súa racha. Non son os únicos títulos que ten, pois tamén foi oito veces campioa mundial. Toda unha fera. Jogos de desporto e diplomacia OSMAR OLVERA, SALTOS (M) MÉXICO, 2004. 1m E 3m. Loitar pola túa primeira medalla olímpica non debe ser nada fácil. Aínda así, Olvera vén de facer unha tempada incríbel. Neste 2024 logrou dúas preseas mundiais, un ouro en un metro e un bronce en tres, que se suman ás dúas pratas logradas en Xapón o pasado ano. Pinta moi ben a súa participación en París. MARÍA PÉREZ, ATLETISMO (F) ANDALUCÍA, 1996. MARCHA. A actual dobre campioa do mundo chega a París como unha das claras favoritas a subir o podio na proba individual. Nos seus pés tamén ten o récord do mundo nos 35 km marcha, que logrou no ano 2023. Xa só lle falta a medalla olímpica. CAELEB DRESSEL, NATACIÓN (M) ESTADOS UNIDOS, 1996. LIBRE E BOLBORETA. O sete veces campión olímpico e 21 veces campión mundial nadará na piscina olímpica de París para facer historia unha vez máis. Os datos aválano, xa que posúe o récord do mundo nos 100 metros bolboreta en piscina longa.Ademais, adestra cun dos mellores, Kipchoge. FAITH KIPYEGON, ATLETISMO (F) KENYA, 1994. 1.500m E 5.000m. No tartán de París poderemos ver as zancadas máis elegantes do atletismo por parte desta plusmarquista mundial. Conta con dous récords do mundo e unha plusmarca nos 5.000. Ademais, adestra cun dos mellores, Kipchoge. A eclosión do deporte adaptado: o camiño cara á profesionalización dos Xogos Paralímpicos NOAH LYLES, ATLETISMO (M) ESTADOS UNIDOS, 1997. 100m, 200m E 4X100m. Lyles intentará revalidar en París o triplete que logrou nos mundiais de Budapest e achegarse ao máximo aos récords históricos de Usain Bolt. A proba na que o ten máis difícil é a dos 200 metros, xa que o xove atleta botswaniano Letsile Tebogo non llo porá nada fácil. SUMMER MCINTOSH, NATACIÓN (F) CANADÁ, 2006. 200m E 400m ESTILOS, 200m BOLBORETA E 200m E 400m LIBRES. Está chamada a ser a nova súper estrela da natación. Antes de cumprir 17 anos bateu dous récords do mundo nos 400 metros estilos e libres. Tamén é dobre campioa do mundo nos 400 libres e 200 bolboreta. Unha das nadadoras máis completas do panorama. SELECCIÓN DINAMARQUESA, BALONMÁN (M) Sempre na loita polas medallas. O mítico Mikkel Hansen retirarase en París, e que mellor maneira de facelo que cunha medalla olímpica. Xa conta con dúas no seu palmarés, un ouro e una prata, pero tras gañar o Mundial 2023 e o Europeo 2024 parece que pode repetirse o éxito. MARIANA PAJÓN, CICLISMO BMX (F) COLOMBIA, 1991. BMX RACING. Aprendeu a montar en bicicleta con só 3 anos e en Londres 2012 obtivo o seu primeiro ouro olímpico. Un feito que volveu repetir en Río 2016. Ademais, conseguiu a prata en Toquio 2020. Agora quere de novo subir ao máis alto do podio olímpico. JON RAHM, GOLF (M) EUSKADI, 1994. O ex número un do mundo chega aos seus primeiros Xogos tras perderse os de Toquio 2020 pola Covid. Non está na súa mellor tempada, pero non hai que subestimar a un dobre gañador de grandes; o último, o Másters de Augusta, en 2023. AMI YUASA, BREAKING (F) XAPÓN, 1998. Leva practicando este deporte desde os dez anos e por primeira vez poderá desfrutar de que a súa disciplina é por fin olímpica. Ten dous cintos mundiais e o seu estilo chega a conmover a calquera público. Pura fluidez e maxia. SELECCIÓN ESPAÑOLA, FÚTBOL (M) Son unhas das seleccións favoritas ao ouro olímpico despois de máis de cen anos de seca nos Xogos. O Estado español foi campión europeo sub-21 en cinco ocasións; en París competirán os sub-23. Parece que París pode ser o seu momento despois de levantar a Eurocopa na categoria absoluta. LUCÍA MARTÍN-PORTUGUÉS, ESGRIMA (F) MADRID, 1990. SABLE. A esgrimista vén de asinar unha das súas mellores tempadas. Conseguiu o ouro no Europeo de Basilea na proba por equipos e foi campioa tamén na individual da Copa do Mundo de Plovdiv deste mesmo ano, ao que suma unha prata en 2022 en Argel. ALBERTO FERNÁNDEZ, TIRO (M) MADRID, 1983. FOSO. O actual campión olímpico e tres veces campión mundial ten moitas posibilidades de dar unha nova alegría en París. Aínda por riba por partida dobre, pois tamén intentará manter o seu título de campión na proba de foso mixto xunto a Fátima Gálvez. SELECCIÓN ESPAÑOLA, WATERPOLO (F) O combinado español é unha das grandes potencias mundiais e chega a París co obxectivo de repetir presea e, a poder ser, de ouro. Veñen de ser prata e bronce o ano pasado no Europeo e mais no Mundial. As expectativas deste equipo son altísimas.