Abel Caballero encárase con veciñanza de Teis que pedía aseos para a ETEA: "Pedídellos ao Bloque"
O alcalde de Vigo, Abel Caballero, protagonizou na mañá desta segunda feira un polémico enfrontamento con veciñanza de Teis que reclamaba melloras para o barrio.
Os feitos producíronse cando o rexedor estaba a realizar unha nova visita institucional para coñecer o estado das obras da porta do Sol, mais alí varias persoas agardaban a súa chegada portando cartaces e recriminándolle a falta de hixiene na ETEA (a antiga Escola de Transmisións e Electrónica da Armada).
A Asociación Veciñal de Teis leva "anos" urxindo a instalación de aseos públicos no lugar, que non conta con ningún en toda a súa superficie. "Os nenos xogan onde os homes mexan, alí, na area".
Porén, nin Xunta da Galiza nin Concello de Vigo, aseguran desde o colectivo, deron aínda resposta ningunha á súa petición.
Caballero, que non agardaba tal recibimento, limitouse a saudar a ese grupo de persoas e dicirlles: "Non valedes, non valedes".
Porén, á vista de que as protestas non cesaban, optou por dirixir as demandas aos gobernos anteriores á súa chegada ao poder (2007): "Xa volo fixo [o aseo] o Bloque, pedídellelo a eles, pedídello a [Lois Pérez] Castrillo [ex alcalde da cidade]".
E unha veciña respondeu: "Eu non son do Bloque, que me importan as eleccións? Por que non se achega alí algún día". Aliás, outra asistente replicou: "Castrillo non manda, manda vostede".