A Academia de Ciencias enxalza a pioneira da xenética médica
A Real Academia Galega de Ciencias (RAGC) recupera este Día Internacional da Muller e a Nena na Ciencia unha figura pouco coñecida na Galiza e no Estado español pero fundamental para entender a medicina tal e como é hoxe. A institución vén de rescatar o legado de Jimena Fernández de la Vega para homenaxeala como “Científica do ano 2021” coincidindo coa efeméride de mañá.
Á hora de escoller a esta científica, o colectivo tivo en conta o “seu carácter loitador” que, entenden, xa se amosou no feito de que Fernández de la Vega fora a primeira licenciada en Medicina en Compostela, onde acadou un premio extraordinario. O fito foi da man da súa irmá Elisa.
Desde o punto de vista da RAGC, a investigadora é recoñecida, entre outras cousas, porque acertou ao “incorporar a xenética no ámbito da saúde, sendo unha verdadeira pioneira da xenética médica en España”.
Mais Fernández non limitou os seus avances profesionais a ese campo senón que tamén traballou na hidroloxía. En consecuencia, o colectivo sostén que é preciso “dar a coñecer a súa figura como exemplo de muller científica en tempos nos que non era doado ser admitida e recoñecida”.
O acto central da homenaxe está previsto para outubro, co gallo do “Día da Ciencia na Galiza”, pero xa se preparan distintas actividades para informar sobre a súa traxectoria.
Malia que as irmás Jimena e Elisa eran naturais de Asturias, estudaron na Universidade de Compostela, sendo as primeiras mulleres licenciadas na institución académica. Ademais, a científica foi docente e xenetista na Galiza, se ben pasou tempo estudando no estranxeiro.
Segundo a RAGC, conseguiu unha das cincuenta bolsas de investigación para especializarse fóra de España e estivo en Alemaña e Austria, onde colaborou cos profesores Friedrich Kraus, Theodor Brugsh, Erwin Baur, Hermann Poll e Julius Baur.
Aproveitou esa estadía para estudar a herdanza mendeliana “con aplicación á clínica e traballos de xenética experimental sobre os problemas constitucionais e a súa relación coa herdanza (xenotipo). Cando regresou a Galiza, detectou o descoñecemento das bases da xenética desde o punto de vista da saúde polo que emprendeu unha labor de divulgación do tema.