Adega Castrofiz, viño singular de Chantada

N o ano 2017 botou a andar Castrofiz, unha adega pequena da Ribeira Sacra, que tivo os seus inicios da man de dous amigos que andaban á procura dun viño que a eles propios lles gustase beber, ese que fora elaborado desde a tradición ribeirá chantadesa e desde o respecto á terra, á viña e á súa simbiose co patrimonio no cal se integra. "O nacemento veu dado por unha xuntanza familiar", comenta a Nós Diario Héctor Ferreiro, un dos donos da adega, que xunto con José Luis Fernández Pedreira, deu inicio a este proxecto que se basea nunha viticultura tradicional e sostíbel. "Somos grandes defensores dos viños da Ribeira Sacra e da subzona de Chantada e todo o que é o val do viño. Buscabamos un viño que realmente nos gustase beber, que fose elaborado de maneira tradicional mais sen escapar ás novas ideas e sinerxías para ter un viño máis redondo e estruturado", relata Ferreiro. Respecto á contorna e ao produto Para a elaboración dos viños de Adega Castrofiz, empregaron técnicas respectuosas co produto xa desde o viñedo, pois non empregan herbicidas. Na adega tampouco usan ovo para o clarificado do viño nin ningún outro produto de orixe animal, polo que os viños tamén poden ser consumidos por persoas vexetarianas ou veganas. Buscan, por tanto, o rigor vinculado á autenticidade dun produto sen máis pretensións que a de celebrar os sabores propios desta terra, traballada coas súas artes. A este respecto, Héctor Ferreiro comenta que "respectamos moito toda a contorna e procuramos tocar os viños o menos posíbel para conseguir os sabores máis naturais posíbeis. Queremos que, cando se consuma un viño de Castrofiz, se lembren os viños de antes, ben feitos e ben elaborados". O respecto, que fai parte do proceso de elaboración desde os primeiros momentos, dá resultados. Segundo comentan desde a adega, reciben boas críticas por parte de moita xente que decide probar os seus produtos. "A verdade é que os nosos viños teñen moi boa aceptación e moi boa acollida. Sobre todo entre a xente maior que, ao bebelos, se trasladan a tempos pasados", relata Ferreiro. Limpeza, limpeza e limpeza "O segredo de facer un bo viño pasa por seguir tres normas que son: limpeza, limpeza e limpeza", manifesta Ferreiro ao tempo que destaca as variedades de uva que traballan en Castrofiz. "Traballamos moito a mencía ou a garnacha, variedades que se utilizaban máis antes e que lle dan aos viños un toque de acidez e de color", destaca Ferreiro. Sobre a superficie, contan con tres hectáreas con máis de 100 cavaduras (unha unidade de superficie tradicional, xa en desuso, que equivalía aos traballos que unha persoa era capaz de realizar nos viñedos durante un xornal). Nesas cavaduras teñen cepas tintas (uvas de variedades mencía, brancellao, sousón, garnacha tintureira, merenzao e gran negro) e unha hectárea de cepas brancas (godello, treixadura, albariño, dona branca e branco lexítimo) que se espallan entre a Ribeira Sacra, polas parroquias de San Fiz en Chantada, Castelo e Sobrecedo en Taboada, e Belesar no Saviñao, onde as cepas máis lonxevas conviven en sinerxía coas novas xeracións na procura do equilibrio que pretende Castrofiz. Posúen ademais unha parcela de 0,6 hectáreas con certificado do CRAEGA (Consello Regulador de Agricultura Ecolóxica da Galiza), porén o seu obxectivo vai máis alá dunha produción respectuosa co solo e apostan por unha viticultura e enoloxía sostíbeis mais tamén depositarias e transmisoras dos saberes tradicionais ao tempo que profesionalizadas. Sen dúbida unha adega excepcional, cuns viños de calidade que aproban o exame do tempo.