VÍDEO | Adega e Mariña Patrimonio denuncian o uso dunha mámoa protexida como rampla de saltos nunha competición de motos
As organizacións piden que se tomen as medidas necesarias para que esta e outras mámoas do lugar non se vexan afectadas por estes eventos.
A Asociación para a Defensa Ecolóxica de Galiza (Adega) e Mariña Patrimonio veñen de presentar perante a Dirección Xeral do Patrimonio Cultural unha denuncia pola utilización da "Mámoa de Guítara 1" como rampla de saltos en probas motociclistas de “enduro”.
O xacemento arqueolóxico denominado "Mámoa de Guítara 1" (GA27041044), catalogado e protexido pola DXPC desde o ano 1990, sitúase no Monte de Sampaio, en Guítara, no concello de Pantón (Terra de Lemos), no predio con número de referencia catastral 27041A07600392.
Nas últimas actualizacións de varios visores de ortofotografías, móstranse imaxes aéreas onde se aprecia claramente que na parcela citada existe o trazado dun circuíto para motos. Nestas imaxes vese que o trazado do circuíto pasa por riba do túmulo catalogado e protexido pola Dirección Xeral do Patrimonio.
Segundo as noticias de prensa, as probas motociclistas de "enduro" do Alto de Guítara, nas que chegaron a participar 250 motos, veñen decorrendo deade o ano 2022, e a última edición tivo lugar en marzo de 2024.
Estas competicións poden verse en varios vídeos en YouTube que deixan claro que este monumento megalítico é utilizado como rampla para os saltos das motos. É importante ter en conta que esta estrutura funeraria da Mámoa de Guítara, construída no Neolítico, pode ter unha antigüidade duns 5.000 anos.
As asociacións Adega e Mariña Patrimonio denunciaron estes feitos por considerar que as carreiras de motos sobre este ben patrimonial protexido probabelmente non conten coa preceptiva autorización da Dirección Xeral do Patrimonio Cultural.
Así mesmo, solicitan que se tomen de inmediato todas as medidas necesarias para evitar que no futuro estas probas afecten o xacemento arqueolóxico ou a súa contorna de protección. Ademais, tendo en conta que no Monte de Sampaio, en Guítara, hai outras nove mámoas catalogadas, pídese que se inste á organización do evento a cambiar a localización destas competicións.