Vexacións, coaccións e malos tratos: adiado por terceira vez na Coruña un xuízo por violencia machista

A sección primeira da Audiencia Provincial da Coruña suspendeu de novo un xuízo fixado para esta segunda feira contra un home acusado de maltratar de maneira continuada a súa parella, á que insultaba, pegaba, vexaba e coaccionaba diante dos seus fillos menores e á que tentou agredir sexualmente, segundo recolle o escrito da Fiscalía. Debido á incomparecencia de dous dos peritos, que acreditaron a imposibilidade de comparecer, a vista oral foi fixada para o vindeiro 9 de outubro, ás 9.45 horas.

O xuízo xa fora aprazado noutras ocasións, en concreto por enfermidade do acusado e pola folga de Letrados da Administración de Xustiza. O Ministerio Fiscal pide para o procesado 12 anos e cinco meses de prisión, así como unha orde de afastamento da muller de, cando menos, 200 metros durante 26 anos. Tamén demanda que se lle prohiba comunicarse con ela e que a indemnice con 7.000 euros.

"Frecuentes insultos e menosprezos"

Segundo recolle o escrito de acusación do Ministerio Público, ambos os dous mantiñan unha relación sentimental desde 1993 e convivían desde 2005, unha unión da que naceron dous fillos, que no momento da denuncia tiñan 10 e 8 anos. O fiscal sinala que a relación "tornou difícil desde o principio", con "frecuentes insultos e menosprezos" por parte do home cara á súa muller, á que infrinxía "un trato degradante e vexatorio".

Desde o comezo da relación, engade o escrito, o acusado "exercía control sobre as súas relacións persoais e familiares", provocando nela "un illamento social", así como sobre a economía, dado que a muller non dispuña de conta propia nin de tarxeta de crédito e debía pedirlle a el o diñeiro. O acusado tamén exercía control sobre o seu teléfono móbil e as súas mensaxes, chegando mesmo "a revisalo a diario".

De forma paralela, "era habitual que o acusado exercese sobre a parella terror e medo", con frases como "marcha desta casa, que é miña", e chegou a tirar a súa roupa e a botala do domicilio, "tendo que permanecer ela no exterior porque non tiña onde ir". As actitudes, explica o Ministerio Público, "agudizáronse en 2018, cando se puxo fin á relación". A partir desta data, o escrito de acusación narra dous episodios violentos ocorridos no mes de novembro.

En concreto, o 3 de novembro, cando os catro membros da familia se dirixían ao domicilio en coche, iniciouse unha discusión entre a parella na que o acusado chegou a dicirlle á muller "que parase o coche e baixase" e a ameazala con non deixala entrar na casa. "Acto seguido, o acusado colleulle o volante e virouno bruscamente, provocando que o coche saíse da vía e obrigando a muller a frear bruscamente o vehículo" no que tamén viaxaban os seus fillos pequenos.

Posteriormente, o día 6, mentres ela tamén se atopaba coidando dos menores, o home envioulle unha mensaxe de texto na que a instaba a ir ao cuarto de baño da vivenda e manter relacións sexuais. Ante a ausencia de contestación por parte dela, o home saíu "espido e enfurecido" do baño e arrastrouna até alí, fechando a porta e empurrándoa de xeonllos para obrigala a practicarlle unha felación. Finalmente, desistiu da acción "polos prantos dos menores e os berros" da muller, á vez que a arroxou con forza, causándolle lesións. A vítima interpuxo unha denuncia ao día seguinte.

O fiscal considera os feitos constitutivos dun delito de malos tratos habituais, un delito de coaccións graves, un delito de lesións no ámbito familiar e un delito de tentativa de agresión sexual.