Anpas de Vigo denuncian "recortes" en educación malia os "anuncios propagandísticos" da Xunta: "Míntennos á cara"

A Federación Olívica de Asociacións de Pais e Nais de centros escolares de Vigo (Foanpas) denunciou "recortes" nos colexios públicos vigueses, a pesar dos "anuncios propagandísticos" da Xunta da Galiza.

Nunha rolda de prensa esta terza feira, distintos representantes de asociacións de nais e pais de decenas de colexios da cidade criticaron a situación que se vive neste inicio de curso, asegurando que os centros sofren unha redución do número de docentes, sobre todo aqueles especialistas en audición e linguaxe ou orientadores, necesarios para estudantes con dificultades.

A primeira en tomar a palabra foi a presidenta de Foanpas, Iria Salvande, quen puxo o foco nos "recortes, que a Consellaría di que non existen", polo que animou as distintas Anpas a falar para plasmalos ante os medios de comunicación. "No canto de mellorar, empeoramos. Temos moitos menos medios", reivindicou.

Así, foron moitos os presidentes das distintas Anpas de colexios vigueses os que expresaron o seu malestar pola situación que viven este mes de setembro.

É o caso do colexio Santa Mariña de Cabral, que denunciou que este curso quedáronse sen especialista en audición e linguaxe e que a Consellaría lles infiormou que será substituído por un docente procedente do Programa para a Orientación, Avance e Enriquecemento Educativo (Proa), pagado con fondos europeos.

Ao seu xuízo, é a Xunta quen debería soster a educación pública e estas axudas europeas son uns apoios a maiores, polo que non ve xusto que se reduzan profesores para traer 'proas' que só operan de outubro a maio.

Ademais, moitos outros centros vigueses denunciaron situacións similares, con problemas de redución de profesores, con aulas unificadas ou incapacidade de atender a todos os nenos e nenas con problemas en educación.

Tamén criticaron a situación na que se atopan as instalacións de moitos colexios, con problemas estruturais que tería que solucionar o Executivo galego. Outra das queixas é o servizo de autobús ou de limpeza, subcontratados a compañías privadas que nalgúns casos non realizan o seu traballo da forma máis correcta posible, segundo lamentan. "Son nenos, non paquetes de Amazon", engadiron.

Noutra orde de cousas, tamén trasladaron queixas ao Concello de Vigo, ante un novo atraso nas bolsas de comedor, con miles de nenos que non acoden porque as súas familias non poden pagalo até que se resolven as axudas dentro de varios meses.

Tamén sinalan cara á falta de conserxes, un servizo que foi privatizado en moitos casos e que agora non está dispoñible en varios centros, tal como indicaron desde Foanpas.

Unha das Anpas presentes na rolda de prensa foi a do CEIP Altamar, que a semana pasada denunciou danos no centro e unha praga de cascudas e roedores. A pesar de que o Concello de Vigo asegurou non ter coñecemento desta praga, desde o Anpa reivindicaron que si deron aviso xa a principios do curso pasado a través de varios correos electrónicos.

Nestas mensaxes, ás que tivo acceso Europa Press, a propia directora do centro informaba á concelleira Olga Alonso sobre a presenza de cascudas e ratos. "Levamos varios cursos loitando coa praga e xa non sabemos como proceder. Gustaríanos saber como actuar e ter soporte ante esta situación", lamentaban no escrito, o cal o goberno local asegurou descoñecer.

Ante esta situación, Foanpas anunciou que a semana que vén levará a cabo unha asemblea, que decidirá se se convocan manifestacións en protesta da situación que viven os colexios públicos da cidade.