O Arde Lucus 2024 xa ten data: do 13 ao 16 de xuño

A XXIII edición do Arde Lucus celebrarase do 13 ao 16 de xuño de 2024. Así o trasladou o concelleiro de Xuventude, Jorge Bustos, ás 19 asociacións que fan posíbelesta festa de recreación histórica na capital lucense.

Segundo comunicou o Concello, o edil agradeceu ás asociacións romanas e castrexas que forman parte da organización deste evento o traballo que realizan durante todo o ano, "o seu esforzo e dedicación para recrear con fidelidade" as orixes da cidade.

Así, Bustos avanzou que despois de que o pasado ano se obtivese o recoñecemento de Festa de Interese Turístico Internacional, o consistorio municipal renderá unha homenaxe ás asociacións distinguíndoas coas Medallas de Ouro da cidade.

A entrega deste recoñecemento, a máxima distinción que o Concello concede a entidades ou á cidadanía, terá lugar nunha cerimonia que se desenvolverá o próximo 30 de novembro, no MIHL.

A alcaldesa, Lara Méndez, destacou o alcance "social, turístico e económico" que xera esta festa e explicou que un dos motivos polo cal anuncian as datas con antelacion é permitir que o tecido asociaciativo, os veciños, a hostalaría e o comercio local se poidan preparar e traballar con previsión.