Aumentan os casos activos de Covid en 5 das 7 áreas sanitarias da Galiza
As de Lugo, Vigo e A Coruña rexistraron os incrementos máis importantes.
Dezasete casos activos máis na Galiza nunha xornada, pasando dos 163 desta quinta feira aos 180 desta sexta. Un aumento da man dos episodios e rebrotes que se dan en diversas áreas sanitarias galegas, nomeadamente as de Lugo, Vigo e A Coruña.
A Dirección Xeral de Saúde Pública da Consellería de Sanidade informa que, na última actualización, esta sexta feira, o número de casos activos de coronavirus na Galiza é de 180.
Deles, 43 son da área da Coruña (4 máis ca onte), 80 da de Lugo (6 máis), 4 da de Ourense, 11 da de Pontevedra (2 máis), 31 da área de Vigo (4 máis), 11 da de Santiago (1 máis, e ningún da de Ferrol.
Do total de pacientes positivos, 10 están en unidades de hospitalización e 170 no domicilio, non habendo ningún en UCI.
Polo de agora, na Galiza hai un total de 11.197 persoas curadas, rexistrándose 619 falecementos.
O número de PCR realizadas é de 240.281.
Dentro do total de casos rexistrados na Galiza hai un vinculado con centros residenciais, segundo indica Sanidade, que corresponde a un traballador, mentres as residencias seguen sen persoas usuarias infectadas.