Cales son as principais causas de lesión medular na Galiza?
Os accidentes de tráfico e as caídas no medio rural son na Galiza a principal causa de lesión medular, segundo explicou o xefe da Unidade de Lesionados Medulares do Complexo Hospitalario Universitario da Coruña (Chuac), o doutor Antonio Rodríguez Sotillo.
"A mellor lesión medular é a que non se produce", sentenza ao pedir prevención e tamén concienciación ante prácticas de risco que poden levar a unha lesión medular, "unha patoloxía pouco frecuente pero con graves consecuencias". Ao fío diso, fai alusión ás lesións medulares en ciclistas que, precisa, "son de caídas en estradas, non de colisión con outros vehículos".
En concreto, a Unidade de Lesionados Medulares do Chuac rexistrou o ano pasado un centenar de ingresos agudos por lesión medular, dun total de 185 ingresados. 80% dos mesmos son lesións medulares traumáticas, repartidas á metade entre accidentes de tráfico e caídas no medio rural.
"Típico do noso territorio", apunta, sobre estas últimas, o doutor Sotillo, que alude ao envellecemento poboacional e ás tarefas de mantemento en casa ou leiras que as persoas maiores realizan.
No caso dos accidentes de tráfico, explica que tende a ser un individuo novo que o sofre accidentes de coche, aínda que a eles suma o caso dos ciclistas. Polo momento, na Galiza non se rexistrou ningún de patinete a diferenza do que ocorre en territorios do Mediterráneo ou en Andalucía.
Idades
"Hai tres grupos de idade nos lesionados medulares: persoa moi nova por un accidente de tráfico ou deportivo, como pode ser o de ciclistas no monte; unha idade media, accidentes de tráfico ou de traballo e un terceiro grupo, accidentes por caídas, como tarefas de mantemento", resume o responsable da unidade.
En canto aos ciclistas, incide en que é "unha actividade de alto risco, vas a alta velocidade sobre dúas rodas", indica o doutor Sotillo ao apelar á precaución. "Ir con casco non evita unha lesión medular, si un traumatismo craneoencefálico", asevera.
Mentres, destaca a redución dos accidentes de tráfico, o que vincula coas campañas e unha maior concienciación. A iso, suma a existencia de coches "máis seguros" ou os controis de alcoholemia, dos que afirma que foron "chaves" para reducir sinistros e, con iso, lesións medulares.
Tirarse de cabeza
Respecto dos casos por tirarse de cabeza á auga, asegura que "normalmente son dúas ou tres casos ao ano na Galiza", aínda que neste 2023 non houbo, por agora, "ningún". "Nun ano tivemos doce", lembra ao alertar do risco de tirarse de cabeza e a posibilidade de quedar tetrapléxico.
Por outra parte, incide en que nesta época do ano é onde máis casos hai de lesión medular. "As camas están sempre cheas, hai 31 pacientes ingresados no hospital", apunta.
Segundo expón, ao ano na unidade rexistran uns 100 pacientes agudos, cualificando como tal a aqueles casos de lesión medular producida, por exemplo, por un accidente de tráfico e que necesitan rehabilitación. "O resto son pacientes crónicos, non son para rehabilitación, son por complicación da súa lesión", aclara.
O doutor Sotillo subliña a importancia da prevención e recalca, ademais, que "cada lesión medular é un mundo". "Non hai lesión medular pequena, o individuo vívea como a máis grande". Así, expón que "hai individuos que camiñan ben, pero teñen alteracións nas súas esfínteres ou na súa sexualidade, non existe lesión pequena calquera pode xerar unha discapacidade a título persoal".
En canto ao tipo de pacientes, precisa que hai "tres ou catro casos de homes por un de muller". "É unha patoloxía de home, non coñezo ningún caso na Galiza de lesión medular por tirarse de cabeza en muller", cita como exemplo.
A isto, engade o feito de que as lesións medulares en accidentes de traballo son por "precipitacións". "E iso é máis de homes", afirma o xefe da Unidade de Lesionados Medulares do Chuac, que destaca, en canto aos sinistros de trafico, que as mulleres "conducen infinitamente mellor que os homes, son menos agresivas", di sobre a condución.