Catro terremotos na Galiza nos últimos catro días
Os tremores foron nas comarcas de Allariz-Maceda, O Condado e Terra de Celanova; así como fronte á costa Ártabra
A Galiza foi escenario de dous terremotos, rexistrados a fin de semana, con magnitudes de 1,7 e 1,8 segundo a escala de Richter, o que supón que son movementos sísmicos non perceptíbeis.
Segundo os datos publicados polo Instituto Xeográfico Nacional, o primeiro sismo rexistrouse o sábado sobre as 20 horas, con epicentro no Concello de Xunqueira de Ambía, comarca de Allariz-Maceda, e en superficie. A magnitude do terremoto foi de 1,7.
Horas despois, na madrugada do domingo, rexistrábase outro terremoto, con epicentro no municipio de Padrenda (Terra de Celanova) e a 23 quilómetros de profundidade. A magnitude foi de 1,8.
Este domingo tamén se rexistrou un movemento sísmico leve no Atlántico, fronte á Costa Ártabra, cunha magnitude de 2; mentres que a pasada sexta feira ás 23:30 horas, houbo un movemento sísmico con epicentro no municipio de Mondariz (O Condado), a unha profundidade de 17 quilómetros e de magnitude 2.
O pasado día 19 de marzo a localidade de Sarria, comarca de Sarria, rexistrou na noite do 19 de marzo un novo terremoto, tras o que se deixou sentir o día 15 na zona, aínda que esta vez foi de menor intensidade.
En concreto, segundo a información do Instituto Xeográfico Nacional (IXN), o sismo tivo lugar sobre as 23.30 horas da segunda feira ao norte de Sarria. A magnitude deste tremor foi de 2,3 graos e, segundo o IXN, puido sentirse en Betote de Arriba, Sarria e Samos.