Compostela acolle hoxe un funeral en memoria das vítimas da COVID-19
As dioceses galegas no seu conxunto celebrarán hoxe en Santiago de Compostela un funeral en memoria das vítimas da COVID-19.
A cerimonia será ás 12 horas na compostelá igrexa de San Francisco, onde o Arcebispado de Santiago realiza os seus actos mentres as obras de restauración manteñen fechada ao culto a Catedral compostelá. Estará presidido polo arcebispo de Santiago, Julián Barrio.
Ademais, actuarán como concelebrantes os bispos das dioceses galegas e contarán coa presenza do presidente da Xunta, Alberto Núñez Feixoo.
As diocese galegas lembraron que a celebración se realizará con "todas as medidas de protección vixentes na fase 3", na que se atopa Galiza, co cal, as persoas que desexen asistir poderán facelo até completar a capacidade. Ademais, a cerimonia será transmitida en directo pola Televisión de Galiza.
Na mesma xornada, segundo avanzou o presidente galego hai dúas semanas, a Xunta realizará tamén un acto civil en memoria dos falecidos pola pandemia.