'Comunicar en saúde': médicas internistas fan unha guía on-line para mellorar os autocoidados
Comunicar en saúde é o título do libro que vén de editar a Sociedade Española de Medicina Interna grazas á participación e ao coñecemento experto de medio cento de especialistas, entre eles varios galegos que desenvolven o seu traballo en hospitais da Galiza.
"As persoas doentes xa non quedan só co que lles di os eu médico ou médica de cabeceira, senón que investigan e tiran de internet para resolver as súas dúbidas", onde non sempre todas as fontes son fiábeis. "O que buscamos desde unha sociedade científica como a de Medicina Interna é aumentar o coñecemento que a poboación ten sobre as enfermidades que lle afectan, de forma sinxela, nunha linguaxe accesíbel e desde o rigor científico".
A internista Cristina Macía é coautora do capítulo 31 –Hepatite e cirrose hepática– dun manual enfocado ao paciente, moi visual e de fácil lectura. "Quere ser unha primeira fonte de consulta para que cadaquén saiba en que consiste a súa enfermidade, en que ten que pensar e cando acudir ao médico".
50 patoloxías comúns
A especialidade de Medicina Interna atinxe moitas patoloxías médicas. "Despois da Covid atendemos sobre todo enfermos crónicos, con varias doenzas, e tamén poboación maior que precisa medicación específica para distintas patoloxías, que non poden centrarse só nunha enfermidade senón en todas á vez e no conxunto dos seus tratamentos. Pero ademais disto tamén nos dedicamos ás doenzas hepáticas, infecciosas e autoinmunes".
O traballo guía o paciente no recoñecemento da súa doenza, dos síntomas máis comúns e dos signos de alarma que urxen unha intervención médica
Esta amplitude reflíctese no índice do libro que recolle algunhas das doenzas máis prevalentes entre a poboación: ansiedade, meninxite, hipertensión, infarto de miocardio, gripe, diabetes, convulsións, herpes zóster, hemorraxia dixestiva, ictus, obesidade, hemorroides, vertixe, hipotiroidismo...
O listado de patoloxías alcanza os 50 nomes, entre os que figuran realidades inevitábeis co paso dos anos. O envellecemento, a pluripatoloxía, o final da vida e os coidados paliativos contan, tamén, con cadansúa páxina. Ao igual que a bioética ou a telemedicina.
O ictus, unha doenza que na Galiza afecta cada ano a máis de 7.000 persoas e que require sempre un tratamento médico urxente abre un manual que se pode consultar en liña, descargar "e mesmo imprimir por capítulos de acordo co interese e doenza de cada persoa", un traballo que guía o paciente no recoñecemento da súa doenza, dos síntomas máis comúns e dos signos de alarma que urxen unha intervención médica.
Hepatite
"Cando falamos de hepatite non podemos pensar nunha única enfermidade senón nun conxunto de doenzas. A hepatite é a inflamación do fígado, que atende a múltiples causas". A hepatite vírica é a máis común "pero o consumo abusivo de alcol é talvez a causa máis prevalente na nosa contorna" a diferenza do que xa se observa nos EUA, onde a obesidade e a diabetes aceleran a esteatohepatite non alcólica, advirte Macía.
Evitar o consumo de alcol, manter unha dieta equilibrada, un control estrito da diabetes e do colesterol, a vacinación correcta contra a hepatite B e o uso de preservativo están entre as medidas de prevención contra a hepatite e a cirrose do fígado que fechan os '10 puntos claves' cos que Comunicar en saúde clausura este capítulo concreto e cada un dos escollidos.