Galiza supera o medio milleiro de vítimas mortais pola COVID-19
Un total de 1.730 persoas xa foron dadas de alta.
Esta quinta feira, 23 de abril, non se rexistraron falecementos por coronavirus nas residencias galegas, segundo a Xunta. Das 504 vítimas mortais causadas pola COVID-19 na Galiza máis de 40% (229) están ligadas a este tipo de centros, sendo o principal foco de preocupación. Mais esta quinta feira, indica Sanidade, non houbo vítimas mortais, algo que había tempo que non se producía.
A Dirección Xeral de Saúde Pública informa que, na última actualización, o número de casos activos de coronavirus na Galiza ascende a 6.704 (57 infectadas máis), deles 1.584 son da área da Coruña, 647 da de Lugo, 1.302 da de Ourense, 550 da de Pontevedra, 1.169 da área de Vigo, 1.065 da de Santiago, e 387 da de Ferrol.
Do total de pacientes positivos, 87 permanecen en UCI (5 menos ca onte), 531 están en unidades de hospitalización e 6.086 no domicilio. Polo de agora, en Galiza rexistráronse 1.730 altas de pacientes (56 máis) e 504 falecementos.
O número de PCR realizadas é de 78.822.
Nas residencias a cifra de persoas contaxiadas é de 1.244 das cales 897 son residentes e 347 traballadores e traballadoras. O número de casos de coronavirus detectados en centros residenciais de servizos sociais da Galiza supoñen 3,7% do total das persoas residentes.