Crece a privatización da sanidade: aumenta en 9% nun ano o gasto por persoa en probas e consultas na privada

A Federación de Asociacións para a Defensa da Sanidade Pública (FASP) ven de publicar o seu Informe sobre a privatización das Comunidades Autónomas 2024, un estudo no que percorre a situación da sanidade nos diferentes territorios do Estado, entre eles a Galiza. En comparación co informe anterior, publicado en 2023, obsérvase como na Galiza no último ano houbo un empeoramento en case todas as variábeis analizadas no documento. O que ao longo destes meses veñen denunciando con insistencia profesionais sanitarias, usuarias e valedoras da sanidade pública, colle forma de dato a través da análise da FASP. As galegas e os galegos gastan de media 549 euros cada unha en probas e consultas na sanidade privada —esta cifra non inclúe o gasto en mutuas—. Isto supón un aumento de 9,1% en comparación co que contemplaba o informe anterior (503 euros). Eses 549 euros, ademais, son superiores á media do Estado español para ese mesmo concepto (504 euros). Defensa da Sanidade Pública acusa o Sergas de "escurantismo" e "trampas" nos seus orzamentos Este dato do aumento do que cada galega e galego gasta en probas e consultas na privada refórzase con outra das variábeis analizadas no traballo, a da porcentaxe de persoas na Galiza que acudiron a consultas de médica de cabeceira privada. Agora é de 20,4%, perto de catro puntos superior á porcentaxe que recollía o estudo anterior (16,3%). Consultas En canto a consultas por habitante e ano a especialistas do sector sanitario privado por cada 1000 habitantes, a ratio é na Galiza de 0,31 fronte ao 0,28 do exercicio pasado. Tamén aquí incrementouse o recurso por parte da cidadanía á sanidade privada. Aí pois, cada vez máis persoas recorren á Atención Primaria na privada e cada vez destinan máis diñeiro a pagar na privada servizos de medicina xeral ou de especialistas que tamén hai dispoñíbeis na pública. Galiza sitúase nos postos de cabeza do Estado español en gasto farmacéutico Trátase dunha situación derivada da deterioración do servizo público nestes anos, que ten algunhas das súas consecuencias no aumento das listas de agarda e no recorte de profesionais. A Galiza ten 2.604 médicas e médicos na Atención Primaria; desde o ano 2018 este servizo esencial non tiña tan poucos profesionais. En só un exercicio, de 2022 a 2023, perdeu 39 facultativas, segundo os datos publicados polo Instituto Galego de Estatística (IGE). Seguros O informe tamén rexistra un incremento do gasto na Galiza en seguros privados, que pasou de 129 euros a 135, unha suba de 4,6%. Na Galiza, 17% da poboación dispón xa dun seguro médico privado. Na mesma liña, a porcentaxe do gasto sanitario total da Administración galega destinado a contratación con centros privados pasou nun ano de 4,5 a 4,6. O Consello de Contas presentou esta semana no Parlamento os seus informes de fiscalización nos que, entre outras cuestións, puña cifra ás achegas da Xunta da Galiza á sanidade privada (226 millóns en 2022) e advertía que o número de pacientes e as demoras incrementáronse "de forma xeneralizada" no Servizo Galego de Saúde (Sergas). Segundo Contas, o conglomerado sanitario recibiu dos orzamentos públicos entre 2011 e 2022, último ano fiscalizado, perto de 2.700 millóns de euros. O organismo de control apunta que en cada un dos exercicios do período a cifra estivo por riba de 200 millóns de euros. Oito de cada dez concellos carecen de asistencia bucodental na sanidade pública: hai odontólogo no teu? Dúas variábeis Tan só dúas variábeis presentan melloras a respecto do ano anterior: a porcentaxe de camas privadas sobre o total e a porcentaxe de alta tecnoloxía en hospitais privados sobre o total. En ambas as dúas mellorou a ratio en favor da sanidade pública. O cadro xeral, sinala a Federación de Asociacións para a Defensa da Sanidade Pública, é que a Galiza sitúase no que cualifica como "grao intermedio de privatización". Esta, a privatización da sanidade, continúa a avanzar mais faino dunha forma menos 'agresiva' que en comunidades como Madrid, Andalucía ou País Valencià. Os datos fanse públicos na semana na que o conselleiro de Sanidade, Antonio Gómez Caamaño, está a anunciar o seu compromiso en impulsar diferentes mudanzas a respecto da política sanitaria, no que vén de ser un recoñecemento implícito de que a situación non é boa. A Estatística de Gasto Sanitario do Ministerio de Sanidade publicado o mes pasado volveu situar un ano máis o país á cola do Estado en investimento sanitario. O documento que publicou o Goberno español sinala que a Galiza é a segunda comunidade do Estado español que menos inviste en Atención Primaria. SOS Sanidade Pública "ispe" as carencias da Atención Primaria ante o Parlamento A Galiza destinou en 2022 á Atención Primaria 11,9% do total dos fondos dedicados á sanidade nos orzamentos do Goberno galego. A porcentaxe está 13,1 puntos por baixo da contía recomendada pola Organización Mundial da Saúde (OMS) e é 2,2 puntos inferior á media estatal fixada para ese exercicio en 14,1%. Só Madrid, que dedicou a este nivel asistencial 10,8% do seu orzamento sanitario, investiu menos en Atención Primaria que o Goberno galego. Só 7,9% de enquisadas ve melloras nas listas de espera A deterioración da sanidade pública na Galiza tamén ten pegada na opinión da cidadanía, tal e como recolle outra análise da FASP, Informe dos servizos Sanitarios das CCAA 2023. O documento indica como a puntuación, de 0 a 10, que a cidadanía dá á sanidade pública galega pasou de ser 6,68 en 2022 a ser 5,48 en 2023. A porcentaxe de persoas que opinaban que a sanidade pública na Galiza funcionaba "ben ou bastante ben" pasou de superar 74% en 2022 (74,2%) a estar en 2023 en 65,8%. Unha baixada de máis de oito puntos. Este informe tamén contempla a "valoración global", isto é, a porcentaxe de persoas que foron atendidas en Atención Primaria, consulta de especialista, Urxencias e hospitalización e consideran que a atención recibida foi boa ou moi boa. Hai dous anos optaban por esa valoración positiva 84,4% das enquisadas, mentres que o ano pasado era case 1 punto menos, 83,5%. 257.000 persoas están en listas de agarda hospitalarias na Galiza: Aumenta a espera para unha operación ou ver un especialista Por último, e nunha variábel que se introducía por vez primeira nestes informes anuais, incluíase a porcentaxe sobre as persoas que consideraban que houbera melloras nas listas de agarda. Na Galiza esa percepción só a tiña 7,9% das galegas. 257.308 persoas figuraban en lista de agarda estrutural hospitalaria na Galiza a 31 de decembro de 2023.