Curso de horta na casa: Preparar o horto para a seguinte tempada

Limpar o horto e facer bancais Cando remata a época de colleitas o horto adoita quedar moi lesionado. Os terreos están baixos de nutrintes, hai malas herbas nos bancais e nos regos, os restos dos cultivos seguen a estar na horta... Polo que nos meses de outono é moi recomendábel pór solución a estes problemas. Cómpre limpar os terreos, bancais e testos quitando as malas herbas e os restos de cultivos. Tamén os restos de froitos ou froitas que estean polo chan e que poidan podrecer e ser transmisores de fungos, insectos etc. Poderán agregarse á pila de compost, aínda que non é de todo recomendábel nesta época porque debido ás baixas temperaturas é probábel que non chegue á temperatura precisa para acabar cos posíbeis fungos e mofos que poidan conter. Unha vez limpos os bancais, testos ou terreo de cultivo, agregaremos unha capa xenerosa de compost e cubriremos cun acolchado de herba seca, palla ou follas secas. Desta maneira axudaremos o terreo a ir recuperándose e enchéndoo de novo de nutrientes. É moi importante realizar isto no inverno para que o substrato vaia recuperando e sexa fértil de cara ao ano seguinte. Non debemos cubrir excesivamente co acolchado xa que nos interesa que as xeadas e as baixas temperaturas do inverno traballen na terra acabando con algunhas pragas e enfermidades. Planta cultivos de outono Outra tarefa que podemos facer durante os meses de outono na horta é plantar cultivos de outono e inverno como, por exemplo, allos e cebolas en bancais ou zonas en que no ano anterior non había plantados estes tipos de cultivos. Antes de sementalos deberemos quitar as malas herbas e restos de cultivos do ano anterior e proporcionar fertilizante ao terreo. Unha vez fertilizado airearemos ben e deixaremos o terreo solto e brando para plantar os novos cultivos. Non debemos plantar allos e cebolas no mesmo terreo no que xa houbera a pasada tempada os mesmos cultivos. Realizar máis bancais Outra das tarefas a realizar ao finalizar a tempada, ademais de preparar o terreo para a seguinte e de reparar os posíbeis danos que teñan os bancais ou testos, é fabricar novos espazos para plantar. Isto pode ser ampliar a horta ou fabricar máis bancais ou testos de cultivo. Esta tarefa facilitaranos moito o traballo de cara á seguinte tempada, xa que os bancais unha vez fabricados son moi sinxelos de preparar e de traballar, tendo unicamente que retirar as malas herbas que poidan nacer durante o outono/inverno e aireando a terra cando vaiamos facer uso deles. Como vimos nas leccións anteriores, podemos fabricar bancais con materiais moi diversos tales como madeira, palés, tellas, ladrillos, pedras, pneumáticos, botellas de auga etc. Recoller as follas secas Durante o outono podemos facer acopio de follas secas das nosas froiteiras ou árbores que teñamos perto da horta. As follas secas son perfectas para achegar aos composteiros material estruturante ou para realizar acolchados ou mulching na horta. Se secamos correctamente as follas, gardándoas sen ningún tipo de humidade en sacos, podemos conservalas durante varios meses e utilizalas durante a primavera e o verán para protexer o terreo dos cambios de temperatura bruscos, xeadas, exceso de calor, para reter humidade etc. Facer sementeiros no verán Aínda que o outono é unha época menos produtiva que o verán, hai moitos cultivos que se poden plantar e cultivar durante esta época, polo tanto é importante realizar sementeiros a comezos do verán para ter plantón preparado para transplantar nos meses de outono. Hai algúns cultivos como allos, cebolas, acelgas, espinacas, porro ou cenoria que se dan ben no outono e que se poden cultivar practicamente en calquera época do ano. Fertilizante verde Dentro das accións que podemos realizar durante o outono ou ao finalizar a tempada de primavera e verán está a do fertilizante verde ou cultivo de cobertura. Trátase dunha opción perfecta e natural para pasar da mellor maneira posíbel os meses máis fríos e duros do ano e de axudar o noso solo a recuperarse da tempada anterior e volver enchelo de nutrientes. Os ferilizantes verdes serven para proporcionar ao chan un descanso activo que o recargará de fertilidade e o axudará a controlar as malas herbas, ao mesmo tempo que estrutura de novo o solo. O fertilizante verde consiste na sementeira á manda dun cultivo que resulte interesante polas súas propiedades para rexenerar e mellorar o substrato en lugar de deixalo a barbeito. Grazas a esta cobertura vexetal imos achegar ao solo nitróxeno, aireación grazas ás raíces dos cultivos que irán abrindo paso no substrato e removéndoo, controlar as malas herbas e achegar grandes cantidades de materia orgánica cando cortemos as plantas e as mesturaremos como fertilizante xunto co substrato. Que plantas usar como fertilizante verde? —Podemos usar como fertilizante verde gramíneas como, por exemplo, o centeo, a avea ou a cebada, combinadas con leguminosas, desta maneira manteremos unha proporción axeitada de carbono e nitróxeno. Este tipo de fertilizante verde é o máis axeitado para botar cando finalizan os cultivos de outono. —Tamén podemos utilizar como fertilizante verde ravos, rábanos, mostaza ou outro tipo de crucíferas, xa que estas son moi pouco esixente e desenvólvese con moita rapidez. Resultando perfectas para terreos pobres en materia orgánica. —Outras plantas que podemos usar como cobertura vexetal son as leguminosas tales como chícharos, fabas ou incluso os trevos. Estas son fixadoras de nitróxeno e ademais actúan como inhibidoras de malas herbas. Este tipo de cultivos xunto coas crucíferas son os máis axeitados para utilizar durante o outono despois dos cultivos de verán. Como incorporar o fertilizante verde ao noso terreo? Unha vez que o fertilizante verde estea medrado e antes de que comece a floración do mesmo procederemos segalo. Convén facelo xusto nese momento por que é cando as plantas conteñen un maior número de nutrientes e propiedades. Para segalo farémolo cunha desbrozadora de man ou co gabillo se é un anaco pequeno. Deixarémolo un par de días estendido na superficie do solo, e pasado ese tempo mesturarémolo co substrato, enterrándoo como máximo a uns 5 ou 6 cm de profundidade. Estas son algunhas das tarefas que podemos realizar cando rematemos a tempada de primavera/verán e a nosa horta se volva máis improdutiva. De todas formas debemos saber apreciar as posibilidades que nos ofrece o outono, xa que aínda que non é a época máis produtiva do ano, segue a ser un momento en realizar moitos labores na horta e sementar diferentes tipos de cultivos. Os 3 'R' na horta: Compostaxe caseira Durante todas as leccións anteriores falamos de como reutilizar elementos físicos de refugallo que todas e todos podemos ter na casa, converténdoos en elementos útiles para a horta. Vimos o exemplo de como reutilizar latas, cartóns, madeira, cuncas, vasos, botellas de plástico.... e fáltanos só tratar uns elementos moi importantes e que producimos a diario: os restos de comida. Agora que coñecemos os beneficios da compostaxe caseira, do compost ou do fertilizante orgánico é o momento de reutilizar e reconverter todos os restos orgánicos aptos para este método que producimos na casa nun elemento nutritivo para a horta. Tonas de froita, restos de vexetais, cascas de ovo, panos de mesa sen tinta, cartóns etc. son elementos que todos os fogares producen a diario e que en moitas ocasións acaban no lixo. Debemos aproveitar todos estes materiais como un excelente fertilizante para a nosa horta. Preparados naturais para a horta. O tomate como insecticida natural As follas das tomateiras son ricas en alcaloides e por tanto actúan como potentes insecticidas contra diferentes tipos de insectos como pulgóns, eirugas ou vermes. A continuación imos aprender a preparar un spray insecticida con moi poucos ingredientes. Que preciso? —Dúas cuncas de follas frescas de tomateiras —Tesoiras ou coitelo —Dous vasos de auga —Unha pota ou cazo —Un coador —Un pulverizador Receita —Apaña dúas cuncas de follas de tomateiras frescas. —Corta en anacos moi finos as follas e méteas nun recipiente xunto con dous vasos de auga. —Deixa repousar durante 24 horas a mestura tapada cun pano ou gasa. —Ao día seguinte, coa a mestura. Quedándonos simplemente co líquido, os restos da planta poderemos agregalos á pila de compost. —Unha vez frío e filtrado incorporaremos o líquido a un pulverizador. Como usalo? Podemos usar o preparado durante calquera época do ano. Usarémolo de forma pura, sen diluír. Podemos pulverizar tanto en plantas que estean atacadas por algún tipo de praga como en plantas que corran o risco de sufrila. Espazaremos as pulverizacións cada tres semanas. Debemos de ter coidado coa mestura e non deixala preto de onde poidan inxerila animais domésticos xa que pode chegar a ser tóxica para eles. Eco-consello Os panos de mesa brancos, ao igual que os tubiños de cartón do papel hixiénico, serven como material estruturante para a pila de compost.