Adega e Mariña Patrimonio denuncian danos en dous monumentos megalíticos na Fonsagrada
A Asociación Ecoloxista Adega e Mariña Patrimonio denunciaron posíbeis danos en dous monumentos megalíticos situados na área de influencia do Camiño Primitivo a Santiago ao seu paso polo municipio da Fonsagrada (comarca homónima).
En concreto, as asociacións presentaron un escrito ante a Dirección Xeral de Patrimonio Cultural para informar de posíbeis danos nas 'Medorras do Piñeiral' a causa de traballos forestais que abriron "profundos regos" no terreo no que se sitúan estas mámoas.
Estes dous túmulos megalíticos, apuntan as asociacións, atópanse ao carón do Camiño Primitivo a Santiago e dentro da delimitación do Territorio Histórico deste camiño, Patrimonio da Humanidade. As mámoas foron descubertas no ano 2021 por membros de Mariña Patrimonio, que solicitaron a Patrimonio Cultural a catalogación e protección das mesmas.
En documentación da Dirección Xeral de Patrimonio Cultural de novembro de 2021, proseguen as entidades, recoñécese a existencia destes dous xacementos inéditos aos que Patrimonio denominou como 'Medorra do Piñeiral 1' e 'Medorra do Piñeiral 2', asignándolles senllas claves de identificación no seu catálogo de bens.
Avaliación e reposición
Adega e Mariña Patrimonio solicitaron que se investigue se estes labores forestais contan coa preceptiva autorización da Consellaría de Cultura e que se avalíe o grao de afectación así como os danos que sufriron estes bens patrimoniais. Así mesmo, solicitan a reposición das 'Medorras do Piñeiral' ao seu estado anterior.