Os xulgados galegos reciben no segundo trimestre 1.707 denuncias por violencia machista
Os xulgados galegos recibiron no segundo trimestre do ano 1.707 denuncias por violencia de xénero, 5,8% menos que no mesmo período de 2022, cando se presentaron 1.813, segundo vén de informar o Tribunal Superior de Xustiza da Galiza (TSXG). A gran maioría (1.242) chegaron aos xulgados a través de atestados policiais con denuncia da vítima, mentres que as interpostas pola contorna da vítima (38) apenas alcanzaron 2,2% do total.
Nos meses estudados descenderon tamén o número de mulleres vítimas, pois entre abril e xuño contabilizáronse 1.678, fronte ás 1.811 de 2022, o que supón un descenso interanual de 7,3%. A taxa de violencia de xénero —mulleres vítimas por cada 10.000 mulleres— na Galiza (12) é a máis baixa do Estado, cuxa media foi de 19,2.
Os distintos órganos xudiciais —xulgados de violencia sobre a muller, xulgados do penal e audiencias provinciais— ditaron no segundo trimestre do ano en procesos de violencia de xénero 665 sentenzas, das cales 548, é dicir, 82,4%, foron condenatorias. Entre abril e xuño os xulgados de menores axuizaron tres persoas por delitos relacionados con violencia sobre a muller.
Segundo os datos estatísticos feitos públicos esta sexta feira polo Observatorio contra a Violencia Doméstica e de Xénero do Consello Xeral do Poder Xudicial, no conxunto do país aumentaron por volta de 24,7% os casos de vítimas que se acolleron á dispensa para non declarar.
No segundo trimestre optaron por esta opción 121 mulleres, fronte ás 97 que o fixeron o ano anterior. Ademais, no segundo trimestre solicitáronse ante os xulgados de violencia sobre a muller 477 ordes e medidas de protección da vítima, un 1,9% menos que no mesmo período de 2022, cando se demandaron 486. Delas, foron acordadas 332 (o 69,6%). Nos xulgados de garda sen competencia en violencia sobre a muller solicitáronse 147 ordes de protección, das que se acordaron 88.
Os datos relativos ás medidas civís ditadas polos xulgados de violencia sobre a muller para protexer aos fillos das vítimas, que reflicten as modificacións legais introducidas na Lei Orgánica de protección integral á infancia e a adolescencia fronte á violencia, reflicten que entre abril e xuño os órganos xudiciais galegos adoptaron 41 medidas consistentes na suspensión do réxime de visitas, case as mesmas que no mesmo período de 2022, cando se adoptaron 39.
En total, aliás, no segundo trimestre do ano rexistráronse 19 menores tutelados vítimas de violencia de xénero, fronte aos seis das mesmas datas de 2022.