Falece atragoada unha muller nun restaurante da Illa de Arousa
23 de agosto de 2024 (13:12 h.)
Á chegada do equipo sanitario desprazado ao lugar só se puido confirmar a morte da muller.
Unha muller, de avanzada idade, faleceu na noite desta quinta feira após atragoarse cando se atopaba comendo unha tapa de polbo nun restaurante no municipio da Illa de Arousa (O Salnés).
Sobre o sucedido, desde o servizo de emerxencias do 112-Galiza confirmaron que recibiron un aviso pouco antes das 21 horas após a chamada de varios particulares.
En concreto, informaban de que esta muller se atragoara mentres comía e pedían unha ambulancia. Ao lugar desprazáronse profesionais de Urxencias Sanitarias-061, ademais de dar parte á Garda civil.
Con todo, á chegada do equipo sanitario desprazado ao lugar só se puido confirmar a morte da muller. Os feitos tiveron lugar nun local da avenida de Castelao.